Qazaqstannyń Halyq jazýshysy, Qazaqstannyń Eńbek Eri, KSRO Memlekettik syılyǵynyń laýreaty Ábdijámil Nurpeıisovtyń 100 jyldyǵyna oraı Almatyda memorıaldyq taqtanyń saltanatty ashylý rásimi ótti. Eskertkish taqta álemge áıgili «Qan men ter» tarıhı-revolúsıalyq trılogıasynyń avtory turǵan úıdiń qabyrǵasyna, ıaǵnı Tólebaev kóshesindegi 156 úıge ornatyldy.
İs-sharaǵa tanymal ádebıetshiniń týystary men jaqyndary Shuǵa Nurpeıisova, Kárim Nurpeıisov, sondaı-aq jazýshylar, memleket jáne qoǵam qaıratkerleri, zıaly qaýym ókilderi, qala turǵyndary men qonaqtary qatysty.
«Ábdijámil Nurpeıisov – kózi tirisinde aty ańyzǵa aınalǵan ǵajaıyp jazýshy. Onyń ómiri men eńbegi – erlik pen órliktiń, parasattylyq pen bekzattyqtyń, eńbekqorlyq pen kásibı sheberliktiń úzdik úlgisi. Ol ádebıet pen Otanǵa adal qyzmet etti. Ábdijámil Kárimuly otandyq jáne álemdik ádebıet tarıhynda jarqyn iz qaldyryp, HH ǵasyrdaǵy qazaq mádenıetiniń sımvolyna aınaldy», - dep atap ótti saltanatty is-shara barysynda Almaty qalasy ákiminiń orynbasary Azamat Qaldybekov.
Sondaı-aq, búgin Almatyda belgili jazýshylar, synshylar men qoǵam qaıratkerleriniń qatysýymen «Álem tanyǵan Ábdijámil» atty halyqaralyq ǵylymı-praktıkalyq konferensıa ótti, onda Mádenıet jáne aqparat mınıstri Aıda Balaeva quttyqtaý sóz sóıledi.
Spıkerler qatarynda Qazaqstan Jazýshylar odaǵynyń tóraǵasy Mereke Qulkenov, TÚRKSOI Bas hatshysy Sultan Raev, túrki memleketteri Jazýshylar odaǵynyń tóraǵasy Ulyqbek Esdáýlet, jazýshy jáne kınodramatýrg Smaǵul Elýbaı, memleket qaıratkeri, aqyn, dramatýrg, Qazaqstannyń Eńbek sińirgen qaıratkeri Nurlan Orazalın, aty ańyzǵa aınalǵan teatr jáne kıno akteri, Qazaqstannyń Eńbek Eri Asanáli Áshimov jáne basqa da kórnekti qaıratkerler boldy.
Ábdijámil Nurpeıisov 1924 jyly 22 qazanda Qyzylorda oblysynda dúnıege keldi. Uly Otan soǵysyna da qatysqan. Onyń áıgili «Qan men ter» trılogıasy álemniń 30 tiline aýdaryldy. Ol óziniń ádebı shyǵarmalarynda Aral teńiziniń máselelerin de kótergen bolatyn. Máselen, Aral teńiziniń apatqa ushyraý hıkaıasy «Sońǵy paryz» roman-dılogıasynda sýretteldi. Ol eńbegi úshin ádebıetshi 2003 jyly Sholohov syılyǵymen marapattalǵan edi.