Qala ákimi Áýezov aýdanynda qurylatyn jańa qoǵamdyq keńistikter týraly aıtty
Almatynyń Áýezov aýdanynda tórt jaıly qoǵamdyq keńistik paıda bolady. Bul týraly Áýezov aýdanynyń turǵyndarymen ótken kezdesýde qala ákimi Erbolat Dosaev málimdedi, dep habarlaıdy almaty-akshamy.kz
Jaıly demalys aımaǵy Aqsaı-4, Mamyr-3, 4, Jetisý-3 yqshamaýdandary men №7, 12 yqshamaýdandarda qurylady. Qurylys jumysy osy jyldyń tamyz aıynda bastalady. Tórt jobany júzege asyrýǵa 4 mlrd teńge bólindi.
Aqsaı-4 yqshamaýdanynda Marǵulan men Ulyqbek kósheleriniń arasyndaǵy jalpy aýdany 3,3 ga bolatyn qoldanystaǵy skver abattandyrylady. Bos aımaq adam kóp shoǵyrlanǵan aýdannyń ishinde ári áleýmettik nysandarǵa jaqyn ornalasqan. Qazir bul ýchaskede demalys orny, sport pen oıyn alańdary joq. Sonymen qatar, jaryqtandyrý men trotýarlar zamanaýı talapqa saı emes.
Jobada 14,3 myń sharshy metrge asfált, 4,6 myń sharshy metrge trotýar tóseý arqyly jaıly demalys aımaǵyn qurý kózdelgen. Sondaı-aq 16,2 myń sharshy metr aýmaqty kógaldandyrý josparda bar. Serýendeý aımaǵynyń boıynda tórt balalar oıyn alańy men sport alańy qurylyp, 45 sham, 50 oryndyq pen 46 ýrna ornatý josparda bar. Qurǵaq sýburqaq ta ornatylady.
Mamyr-3, 4 yqshamaýdandarynda Shalápın kóshesi boıynsha Momyshuly men Saın kósheleriniń arasyndaǵy jalpy aýdany 3,6 ga abattandyrylǵan jaıaý júrginshiler aımaǵy bar ýchaskede kúrdeli jóndeý jumysy josparlanǵan. Qaraýsyz aımaq adam kóp shoǵyrlanǵan aımaqtyń ishinde, áleýmettik nysandardyń janynda ornalasqan. Qarbalas ýaqytta kólik pen jaıaý júrginshiler júktemesi joǵary.
Joba aıasynda jalpy aýdany 13,2 myń sharshy metr asfált jabyny, 6,5 myń sharshy metrge trotýar jabyny tóselgen jaıly serýendeý aımaǵy qurylady. Sondaı-aq 3 myń sharshy metr aýmaqty kógaldandyrý josparda bar. Jaıaý júrginshiler aımaǵynyń perımetri boıynsha 3 balalar oıyn jáne sport alańy, 3 aspaly besedka, 137 sham, 46 oryndyq pen 32 ýrna qoıylady.
Jetisý-3 yqshamaýdanynda Abaı dańǵylynan Momyshuly kóshesine shyǵatyn №61 úıge deıingi ýchaske abattandyrylady. Bul ýchaskede qazir uıymdastyrylǵan jaıaý júrginshiler aımaǵy joq, sondaı-aq rettelmegen kólik aǵyndary baıqalady. Ýchaskeniń jalpy aýdany 2,1 ga quraıdy.
Jobada 10 demalys aımaǵy, balalar men sport alańy bar jańa qoǵamdyq keńistik qurý kózdelgen.
№7 yqshamaýdanynda Altynsarın dańǵylynan Iantarnyı kóshesine deıin jáne Abaı dańǵylynan №12 yqshamaýdanyndaǵy №16 úıge deıin jalpy aýdany 5,1 ga ýchaske abattandyrylady.
Bul ýchaske sonymen qatar bos emes aýdandardyń ishinde ornalasqan, onda demalýǵa jáne serýendeýge oryn joq.
Turǵyndarǵa yńǵaıly bolý úshin trotýar keńistigi keńeıtiledi. Bul 8 balalar oıyn alańy men 9 sport alańy bar 12 alańdy jabdyqtaýǵa múmkindik beredi. Sondaı-aq 130 sham, 68 oryndyq pen 44 ýrna ornatylady. Joba aıasynda 5,2 myń sharshy metrge asfált tóselip, 6 myń sharshy metrge trotýar plıtkalary salynady.
Jańa demalys aımaǵy irgeles turǵan úı alaptarynyń turǵyndarynyń demalyp, jaıly serýendeýi úshin qolaıly jaǵdaılarmen qamtamasyz etedi.