Almatyda 10 tamyzda Abaı Qunanbaevtyń týǵan kúninde qazaqtyń uly aqyny, oıshylynyń eskertkishine gúl shoqtary qoıyldy. Merekelik rásim Abaı alańynda ótti. İs-sharaǵa aqyndar, jazýshylar, qoǵam qaıratkerleri jáne t.b. qatysty, dep habarlaıdy Almaty-akshamy.kz.
Kelesi is-shara Almaty mýzeıinde «Abaı murasy – halyq qazynasy» jyljymaly kórmeniń ashylý saltanatyna jalǵasty. Mýzeıde Abaıdyń ómiri men shyǵarmashylyǵyna qatysty eksponattar qoıylǵan. Sondaı-aq, aqynnyń ákesi Qunanbaı Óskenbaıuly, Abaıdyń aqyndyq mektebi men 80 jyldan astam tarıhy bar aqynnyń mýzeıi týraly materıaldar usynylǵan.
Buǵan qosa, bul kúni «Alataý» dástúrli óner teatrynyń ártisteri metroǵa túsip, uly aqynnyń shyǵarmalaryn mýzykalyq aspaptardyń súıemeldeýimen oryndady.
Keshke «Alataý» dástúrli óner teatrynda «Kún artynan kún týar» teatrlandyrylǵan konsert ótedi: hor men orkestrlik top «Kózimniń qarasy», «Aıttym sálem, Qalamqas», «Tatánanyń áni», «Qarańǵy túnde taý qalǵyp» jáne basqa da kóptegen ánderdi oryndaıdy. Sahna aıasynda aqynnyń týǵan jerine barǵan saparlardan beınematerıaldar men mýzeılerden muraǵattyq materıaldar kórsetiledi.
Eske salsaq, bıyl Qazaqstanda uly aǵartýshy Abaı Qunanbaevtyń týǵanyna 177 jyl tolýy atalyp ótýde. Abaı kúni Qazaqstan Respýblıkasy Úkimetiniń 2020 jylǵy 4 tamyzdaǵy qaýlysyna sáıkes, memlekettik merekeler kúntizbesine endi.
