Almatyda qoǵamdyq kólik júıesin damytý jáne ekologıalyq jaǵdaıdy jaqsartý aıasynda qalalyq avtobýstardy jańartý jalǵasýda. Jeke avtoparkterdiń biri 18 qańtarda marshrýtqa shyǵatyn elektr avtobýstarynyń satyp aldy, dep habarlaıdy aqshamnews.kz
«Golden Dragon» markaly tómen edendi elektr avtobýstary 300 km dıapazonǵa ıe, únsiz, kondısıonerlermen, beınebaqylaý kameralarymen jáne basqa da zamanaýı júıelermen jabdyqtalǵan. Bul avtobýstar №98 marshrýtta «Raıymbek» metro stansıasy - «Baı-Tal» TK qatynaıtyn bolady.
Almaty qalalyq mobıldilik basqarmasy basshysynyń orynbasary Baýyrjan Qumarǵazın qoǵamdyq kólikti damytý jónindegi jumystardyń arqasynda qalada jyl saıyn jolaýshylar aǵyny ósetinin jáne qazirgi ýaqytta kúnine 1,6 mln. jýyq sapar jasalatynyn atap ótti.
«Almaty aglomerasıasymen kóliktik baılanysty qamtamasyz etý úshin ótken jyly biz 20 jańa qala mańyndaǵy marshrýttardy uıymdastyrdyq. Qalanyń 2030 jylǵa deıingi Kólik qańqasynyń master-josparyn iske asyrý aıasynda kóktemde Jeltoqsan kóshesi men Raıymbek dańǵylynyń boıynda eki BRT jelisin salýǵa kirisemiz. Sondaı-aq, ákimdik qyzmet kórsetý sapasyn arttyrýǵa baǵyttalǵan tasymaldaýshylardy sýbsıdıalaýdyń jańa qaǵıdalaryn ázirledi», - dep atap ótti ol.
Óz kezeginde «City Bus» avtobýs parkiniń dırektory Danıar Baıǵabatov kompanıa 14 elektrobýs satyp alǵanyn habarlady.
«Kólik ınfraqurylymyn jaqsartý, jańa tehnologıalardy engizý jáne tasymaldaý salasyndaǵy naqty erejeler bizge uzaq merzimdi perspektıvada josparlaýǵa, jyljymaly quramdy jańartýǵa, kásibı kadrlardy tartýǵa múmkindik beredi. Aldaǵy ýaqytta taǵy 60 elektr avtobýsyn satyp alýdy josparlap otyrmyz», - dedi avtopark basshysy.
Aıta keterligi, aǵymdaǵy jyly Almatyda ákimdik jáne jeke tasymaldaýshylar 800 gaz avtobýsy men 260 elektrobýs satyp alýdy josparlap otyr, bul avtobýstardyń ortasha paıdalaný merzimin 2 jylǵa deıin tómendetýge múmkindik beredi.