Almatyda jyl sońyna deıin 3 dene shynyqtyrý-saýyqtyrý kesheni ashylady
Almatyda turǵyndardy sporttyq is-sharalarǵa qatystyrý 42%-ǵa deıin ósti, dep habarlaıdy almaty-akshamy.kz
Almatyda sport ınfraqurylymyn qurý jumystary jalǵasyp otyr. Bıyl megapolıstiń Túrksib, Medeý, Alataý aýdandarynda 3 dene shynyqtyrý-saýyqtyrý keshenin ashý josparlanǵan. Jańa nysandar kún saıyn barlyǵy 2000-nan astam adamdy qabyldaı alady.
Sonymen qatar, 4 dene shynyqtyrý-saýyqtyrý kesheni, múmkindigi shekteýli jandarǵa arnalǵan sport ortalyǵy, jeńil atletıka maneji, «Medeý» BTSK jańǵyrtý jáne Ortalyq stadıonnyń jobalaý-smetalyq qujattamasyn ázirleý júrgizilýde.
Sport basqarmasynyń málimetinshe, 2023 jyly sportpen turǵyndardy qamtý 42% boldy, bul 924 000 turǵyn. Bir jyl buryn bul kórsetkish 37% edi Ótken jyly barlyǵy 3 myńǵa jýyq sporttyq-buqaralyq is-shara ótkizildi.
Buǵan qosa, salaýatty ómir saltyn ustanýǵa jáne buqaralyq sportty qoldaýǵa qolaıly jaǵdaı jasaý boıynsha júıeli jumys júrgizilip otyr.
2023 jyly sporttyń 64 túri boıynsha 31 myńnan astam bala tegin sport seksıasymen qamtyldy. Aıta keteıik, 4-17 jas aralyǵyndaǵy qala turǵyndary sport seksıalaryna tegin qatysa alady.
Sonymen birge, jalpy sany 32 myńnan astam adamdy qamtıtyn komandalyq sport túrleri boıynsha (shaǵyn fýtbol, basketbol, voleıbol) mektep jáne stýdentter lıgasy quryldy.
Sala mamandaryn kásiptik daıarlaý boıynsha da jumys jalǵasyp keledi. 2023 jyldyń basynan bastap 44 halyqaralyq dárejedegi sport sheberi, 166 sport sheberi, 1895 sport sheberine úmitker jáne 848 birinshi dárejeli sportshy daıyndaldy. 12 sport túrinen 23 adam (taekvondo, áıelder boksy, jeńil atletıka, oq atý, dzúdo, grek-rım kúresi, erkin kúres, baıdarka men kanoede esý, sporttyq gımnastıka, semserlesý, stendtik atý) olımpıadalyq lısenzıalardy jeńip alýǵa úmitker atandy.
Almatyda barlyǵy 3703 sport nysany jumys isteıdi.