2024 jyldyń qańtarynda Almaty elimizdiń oqýshylary qala mýzeılerine tegin kirýge múmkindik alǵan Qazaqstandaǵy alǵashqy qala atandy.
Qala ákiminiń sheshimimen qolǵa alynǵan bul bastama mádenı tárbıe men bilim berý úderisin damytýdaǵy mańyzdy qadam edi. Bir jyl ishinde Almaty mýzeılerine 85 019 oqýshy keldi, dep habarlaıdy aqshamnews.kz.
Mýzeılerge tegin kirý mektep bilimin qoldaýda mańyzdy quralǵa aınaldy. Bul múmkindikti ata-analar ǵana emes, muǵalimder de tıimdi paıdalanyp, oqýshylardy ekskýrsıalarǵa aparyp júr. Balalar tarıhı jádigerlerdi, eksponattar men óner týyndylaryn gıdterdiń jetekshiligimen zertteýde. Tarıh, ádebıet jáne basqa pán muǵalimderi kórip-bilgenin sabaq taqyryptarymen baılanystyryp, oqýshylardyń bilimin tereńdetip, oqý barysyn qyzyqty etýge barynsha umtylýda.
Qala mýzeılerinde usynylǵan tarıhı mańyzdy jádigerler erekshe qyzyǵýshylyq týdyrady. Mysaly, Almaty tarıhy mýzeıine barý arqyly oqýshylar myńjyldyq tarıhy bar shahardyń damýyna qatysty negizgi oqıǵalardy tereń túsinedi, al Ahmet Baıtursynuly mýzeı-úıi qazaq ádebıeti men til reformasyn zerdeleýde qundy resýrsqa aınalǵan. Yqylas atyndaǵy halyq mýzykalyq aspaptar mýzeıi oqýshylardyń mýzykalyq mádenıetti zertteýge jol ashady.
«Oqýshylar mýzeılerge baryp qana qoımaı, artefaktiler arqyly mádenıet pen ónerdi tereń túsinýge úırenedi. Bul olarǵa sabaqta alǵan bilimin bekitip ári synı oılaý daǵdysyn damytýǵa septigin tıgizedi. Ekskýrsıalar qazaq halqynyń tarıhy men dástúrin qurmetteýge yqpal etedi. Bul bastama balalardyń jan-jaqty damýyna yqpal etedi, oı-órisin keńeıtedi jáne mádenıet, óner, tarıhty odan ári zertteýge degen qyzyǵýshylyǵyn oıatady», - dep habarlaıdy Mádenıet basqarmasy.
Igi bastamany júzege asyrýda mýzeı qyzmetkerleriniń eńbegi erekshe ról atqarady. Ekskýrsıamen qosa, olar mektep oqýshylaryna qysh ydys jasaý, tıyn soǵý, zergerlik buıymdar jasaý jáne basqa da dástúrli qolóner boıynsha ınteraktıvti sheberlik dárister uıymdastyrdy. Bul balalarǵa ózin sheber retinde sezinýmen qatar, synap kórýge múmkindik berdi.
Jalpy, mektep jasyndaǵy balalar Almatydaǵy myna mýzeılerge tegin kire alady:
1) Almaty tarıhy mýzeıi (Qabanbaı batyr kóshesi, 132);
2) Yqylas atyndaǵy halyq mýzykalyq aspaptar mýzeıi (Zenkov kóshesi, 24/A);
3) D. A. Qonaev mýzeıi (Tólebaev kóshesi, 117);
4) Ádebı-memorıaldyq mýzeı keshenderi: S. Muqanovtyń mýzeı-úıi (Tólebaev kóshesi, 125 - 4-shi páter), Ǵ. Músirepovtyń mýzeı-úıi (Tólebaev 130, 25-shi páter);
5) N. Tilendıev memorıaldyq mýzeıi (Qonaev kóshesi, 96);
6) A. Baıtursynuly mýzeı-úıi (Baıtursynuly kóshesi, 60);
7) Raıymbek batyr mýzeı kesheni (Raıymbek batyr dańǵyly, 96a);
8) Dástúrli mýltımedıalyq mýzyka ortalyǵy (Nurkent shaǵyn aýdany, 5/11).