Almaty ákimi Erbolat Dosaev Túrksib aýdanynyń turǵyndarymen kezdesýde aýdannyń qoljetimdi ári sapaly medısınany damytý jospary týraly aıtty, dep habarlaıdy aqshamnews.kz
Byltyr qazan aıynda Nurshashqan shaǵyn aýdanynda zamanaýı qural-jabdyqtarmen jabdyqtalǵan jańa otbasylyq dárigerlik ambýlatorıa ashyldy. Ol bir aýysymda 100 adamdy qabyldaýǵa arnalǵan, búginde onyń qyzmetin 12 myńnan astam adam paıdalandy.
«2025 jyldyń tamyz aıynda Aıbasov kóshesinde bir aýysymda 200 adamdy qabyldaıtyn taǵy bir otbasylyq dárigerlik ambýlatorıanyń qurylysy aıaqtalady», — dedi qala basshysy.
Jedel járdem kútý ýaqytyn qysqartý maqsatynda Namagan kóshesinde 10 brıgadaǵa arnalǵan №13 jedel medısınalyq járdem qosalqy stansıasy ashyldy.
Sonymen qatar, kelesi aıda №20 qalalyq emhananyń ǵımaratynda kúrdeli jóndeý jumystaryn aıaqtaý josparlanyp otyr.
Bıyl Namagan kóshesinde bir aýysymda 500 adamdy qabyldaıtyn jańa emhana, Álmerek jáne RV-90 shaǵyn aýdandarynda árqaısysy bir aýysymda 200 qabyldaýǵa arnalǵan eki otbasylyq dárigerlik ambýlatorıanyń qurylysyna qatysty jobalardyń memlekettik saraptamasy aıaqtalmaq. Sondaı-aq, №8 qalalyq klınıkalyq aýrýhanany rekonstrýksıalaý jáne qosymsha qurylys jobasy qarastyrylýda. Qazirgi ýaqytta aýrýhana 1961 jáne 1972 jyldary salynǵan ǵımarattardy paıdalanyp otyr.
№8 qalalyq aýrýhanany qaıta jańartý aıasynda eresekter men balalarǵa arnalǵan kópbeıindi stasıonarlar men polıklınıkany biriktiretin biryńǵaı medısınalyq klaster qurý josparlanǵan. Munda turǵyndarǵa joǵary tehnologıalyq medısınalyq kómek kórsetiledi.