Almatyda jol-qurylys jumystarynyń maýsymy bastaldy, onyń barysynda 224 kóshede jol jabynyna ortasha jóndeý júrgizý josparlanýda. Jóndeletin joldardyń jalpy uzyndyǵy 200 km quraıdy, dep habarlaıdy Almaty-akshamy.kz.
Aǵymdaǵy jyly "Qaırat", "Álmerek", "Alǵabas", "Aqjar" jáne "Shańyraq-1" shaǵynaýdandarynda 70 km jańa jol salý josparlanýda. Bul jaqsy jáne qanaǵattanarlyq jaǵdaıdaǵy qala joldarynyń úlesin 86%-ǵa deıin jetkizýge múmkindik beredi.
Búginde merdiger uıymdar men tehnıkalyq qadaǵalaý anyqtalyp, aýdandyq mańyzdaǵy kóshelerde jol jóndeý boıynsha daıyndyq jumystary júrgizilýde. Aýdandyq mańyzy bar 6 kóshede – Abaı dańǵyly, "Aqsaı-2" shaǵynaýdanyndaǵy Aldanov, Aqtóbe, Semátov kóshelerindegi ótpeli joldar, Aırıha kóshesi - joldardyń uzyndyǵy 5,9 km, bularda jóndeý jumystary bastaldy. Qala ákiminiń tapsyrmasy boıynsha ál-Farabı dańǵylyn jóndeýdiń ornyna "Shańyraq-1", "Aqbulaq" jáne "Tastybulaq" shaǵynaýdandaryndaǵy kósheler jóndeletin bolady.
SHAAJ, Saın, Rysqulov, Raıymbek, Seıfýllın dańǵyldary jáne basqa da qalanyń kúretamyrlary bolyp tabylatyn magıstraldy kóshelerdi jóndeý jumystary oqý jyly aıaqtalǵannan keıin bastalady dep josparlanýda. Jóndeý jumystaryn aǵymdaǵy jyldyń 30 tamyzyna deıin aıaqtaý josparlanýda.
Vision Zero tujyrymdamasyna sáıkes ortasha jóndeýdi júrgizý aıasynda kólik pen jaıaý júrginshiler qozǵalysynyń qaýipsizdigin qamtamasyz etý úshin kóshelerde trapesıa tárizdi jasandy kedergilerdi, qaýipsizdik qaqpaqtaryn, qaýipsizdik araldaryn ornatý boıynsha jumystar júrgiziletin bolady.
Sonymen qatar, qalanyń kóshe-jol jelisinde aǵymdaǵy jóndeý jumystary júrgizilýde. Jumystarǵa 12 brıgada, arnaıy tehnıkanyń 28 birligi, 96 qyzmetker jumyldyryldy. Magıstraldy kósheler men apatty ýchaskelerde jalpy aýdany 15 myń sharshy metrden astam shuńqyrlardy jóndeý jumystary júrgizildi. Jóndeý barysynda 257 lúk kóterilip, 421 metr jıek tegisteldi.
Eske salsaq, Erbolat Dosaevtyń tapsyrmasy boıynsha qalada jol-qurylys jumystarynyń sapasyn baqylaý kúsheıtildi. Almaty ákimi merdiger uıymdarǵa jol ınfraqurylymynyń qyzmet etý merzimin uzartý úshin jańa tehnologıalar men berik materıaldardy qoldanýdy tapsyrdy. Jol aktıvteri sapasynyń ulttyq ortalyǵyna magıstraldyq kóshelerdegi ǵana emes, aýdandyq mańyzy bar kóshelerdegi jumystarǵa da baqylaýdy kúsheıtý tapsyryldy.