Olar qaladaǵy 35 ýnıversıtette bilim alyp jatyr.
Almatyda 7 myńnan asa stýdent jataqhanalar men hostelderge ornalastyryldy, dep habarlaıdy Almaty-akshamy.kz Ǵylym jáne joǵary bilim mınıstrliginiń baspasóz qyzmetine silteme jasap.
Sońǵy úsh aptada Almatydaǵy 35 joǵary oqý ornynyń 7 myńnan asa stýdenti qosymsha jataqhanalar men hostelderge ornalasty. Keıbir ýnıversıtetter óz stýdentteri úshin jekemenshik jataqhanalar men hostelderdi jalǵa aldy, al keıbir ınstıtýttar óz balansyndaǵy ǵımarattardy stýdentter baspanasyna aınaldyrdy, - dep jazylǵan habarlamada.
Mysaly, Abaı atyndaǵy Qazaq ulttyq pedagogıkalyq ýnıversıteti stýdentterdi Qazaq medısınalyq úzdiksiz bilim berý ýnıversıtetiniń, Eýrazıalyq tehnologıa ýnıversıtetiniń jataqhanalaryna qosymsha ornalastyrǵan. Sondaı-aq ýnıversıtet óz stýdentteri úshin jekemenshik jataqhanalar men hostelderden jatyn oryndy jalǵa alǵan.
«Satbayev University, Halyqaralyq bilim berý korporasıasy, «Turan» ýnıversıteti jáne basqa da joǵary oqý oryndary joǵary kýrs stýdentteri úshin qosymsha baspanalardy, onyń ishinde jergilikti kásipkerlerden jataqhanalar men hostelderdi jalǵa aldy», - dep jazylǵan habardamada.
Qaladaǵy 1-kýrs stýdentteri jańa oqý jylynyń basynda tolyq jataqhanamen qamtamasyz etilgen. Stýdentterdi baspanamen qamtý máselesi Ǵylym jáne joǵary bilim mınıstrliginiń baqylaýynda.
Aıta keteıik, búginde Almatyda 104 azamattyq joǵarǵy oqý ornynda 309 jataqhana bar. Onda 101 myńnan astam stýdent turady. 2022 jyldyń sońyna deıin Qazaqstanda 5 myń oryndyq taǵy 17 jataqhanany paıdalanýǵa beriledi dep josparlanyp otyr.