Bıyl memlekettik qarjylandyrý somasy 5,6 mlrd teńgeden asatyny belgili boldy.
Almaty qalasynyń óńirlik komýnıkasıalar qyzmeti alańynda Qazaqstannyń kınoındýstrıasyna arnalǵan brıfıń ótti, dep habarlaıdy Almaty-akshamy.kz.
«Ulttyq kınony qoldaý memlekettik ortalyǵy» KEAQ ókilderiniń aıtýynsha, otandyq fılmderdi jas rejıserler jıi túsiredi.
Spıkerler atap ótkendeı, bıyl Ulttyq kınony qoldaý memlekettik ortalyǵy ótkizgen baıqaý qorytyndysy boıynsha, 62 kınojoba qarjylandyrylady. 2019 jyly 17 kınojoba, al 2020 jyly 39 fılm qarjylandyrylǵan bolatyn.
Bıyl elimizde bir mezgilde 18 tolyq metrajdy, 19 derekti, 17 qysqa metrajdy jáne 8 anımasıalyq fılmnen turatyn túrli janrdaǵy 60-tan astam kınojoba túsirilmek, bul - buryn-sońdy bolmaǵan kórsetkish.
Qazaqstannyń Halyq ártisi, "UKQMO" KEAQ janyndaǵy saraptama keńesiniń tóraǵasy Dosqan Joljaqsynov jýrnalıser aldynda sóz sóılep, konkýrs ótkizý kezinde kóp nárse ózgergenin habarlady.
"Saraptamalyq keńes 80%-ǵa jańartyldy jáne usynylǵan jobalar áldeqaıda qyzyqtyraq ári sapaly bolmaq. Buryn qyrýar qarjy jumsalǵan úlken, monýmentaldy jobalar azaıtyldy. Bıyl jastar tarapynan kóptegen jobalar usynylyp otyr", - dedi Dosqan Joljaqsynov.
Sarapshynyń aıtýynsha, olar shyǵarmashylyq jolyn endi bastaǵan kınemotografısterdiń ómirine joldama bolatyn búdjettik jobalarǵa basymdyq berýge tyrysyp otyr. Halyq ártisi qazaqstandyq kınonyń sapasy týraly sóz qozǵady, jas kórermenge asa qajet otandyq anımasıanyń jaı-kúıi jaıly da aıta ketti. Aldyńǵy eki baıqaýda 5 anımasıalyq joba qoldaý tapsa, bıyl 8 joba jaryq kórmek.
Dosqan Joljaqsynov baıqaýdyń ashyq ári ádil ótip jatqanyn, jobany qorǵaý prosesi onlaın translásıalanatynyn atap ótti. Kez kelgen baıqaýda jeńiske jetetindermen qatar jeńiletinder de bolady, sondyqtan baryq joba birdeı maquldanbaıdy. Bıylǵy jyly kınojobalardy qorǵaýǵa 208 ótinim qabyldandy, onyń 122-si - tolyqmetrajdy fılm, 86-sy - qysqametrajdy fılmder. Konkýrstyq ótinimder arasynda áleýmettik mańyzy bar kórkem fılmder, derekti jáne debúttik fılmder kóp.
Brıfıń barysynda memlekettik qoldaýǵa ıe bolǵan jas kınogerler qatary jyl sanap artyp kele jatqany belgili boldy. Osy jazda kınoǵa baǵa beretin qazylar alqasyna ondaǵan debúterdiń jumysy usynyldy.
Bıyl memlekettik qarjylandyrý somasy 5,6 mlrd teńgeden asatyny belgili boldy. Onyń ishinde áleýmettik mańyzy bar fılmderge (onyń ishinde anımasıalyq) 4,95 mlrd teńge qarastyrylǵan. 500 mln-ge jýyǵy "debút" sanaty boıynsha ótetin fılmderge, taǵy 129,5 mln teńge keń aýdıtorıaǵa arnalǵan fılmderge, 25 mln teńge birlesip shyǵarylǵan fılmderge jumsalady.