Almatyda bıznes sýbektileriniń tólqujattaý júıesi alǵash ret engizildi: bul qalaǵa qalaı áser etedi?
Almatyda «Almaty – bizdiń ortaq úıimiz» naýqany, respýblıkalyq «Taza Qazaqstan» baǵdarlamasy jáne jańa kóriktendirý erejeleri aıasynda bastalǵan 6 039 bıznes nysanynyń tólqujattaýy aıaqtaldy. 1 sáýirden bastap kásipkerler úshin kóriktendirý tólqujatyn mindetti túrde saqtaý engiziledi, dep habarlaıdy aqshamnews.kz
Kóriktendirýge kim jaýapty?
Jańa talapqa sáıkes, árbir bıznes kóriktendirý tólqujatyn alyp, oǵan tıesili aýmaqtyń tazalyǵy men tártibin saqtaýǵa mindetti. Bul talap menshik nysanyna qaramastan barlyq kásipkerge qatysty. Ǵımarat ıeleri, sondaı-aq PIK, MIB, QS sıaqty zańdy jáne jeke tulǵalar men jer paıdalanýshylar aýmaǵynyń tazalyǵyn qamtamasyz etip, ǵımarat qasbetteriniń ýaqtyly jóndelýi men syrlanýyn qadaǵalaýǵa tıis. Sonymen qatar, olar eskertkish taqtalar, kóshe kórsetkishteri (tuıyq kósheler men alańdardy qosqanda), nómirlik belgiler, mańdaıshalar men aqparattyq taqtaıshalardyń tazalyǵyn jáne durystyǵyn saqtaýǵa mindetti.
Qys mezgilinde ǵımarat ıeleri turǵyndar men jalǵa alýshylardy qar men muzdy tazalaý jumystary týraly aldyn ala habardar etýge tıis.
Talaptardyń oryndalýyn kim qadaǵalaıdy?
Kóriktendirý tólqujatynyń talaptarynyń oryndalýyn aýdan ákimdikteriniń kóriktendirý jáne ekologıa bólimi baqylaıdy.
Talaptardy saqtamasa ne bolady?
Talapty buzǵan kásipkerler Qazaqstan Respýblıkasynyń Ákimshilik quqyq buzýshylyq týraly kodeksiniń 505-baby boıynsha ákimshilik jaýapkershilikke tartylady. Shaǵyn bıznes sýbektileri men komersıalyq emes uıymdar úshin aıyppul mólsheri – 30 AEK. Orta bıznes sýbektileri úshin – 40 AEK. İri bıznes sýbektileri úshin – 100 AEK.
Bıznes qalaı tartyldy?
Tólqujattaý úderisi 2024 jyly kóriktendirý erejeleriniń jańartylýynan keıin bastaldy. Bul úderisti jedeldetýde «Jaýapty bıznes – kórikti qala» bastamasy mańyzdy ról atqardy. Ol «Almaty – bizdiń ortaq úıimiz» naýqany aıasynda júzege asyryldy. Aýdan ákimdikteriniń kásipkerlik bólimi bıznes ıelerimen kezdesip, kóriktendirý tólqujattaryn engizý jáne talaptardy oryndaý boıynsha túsindirý jumystaryn júrgizdi. Tólqujattaýǵa aýdan ákimdigi men kásipkerler birlese qol qoıdy.
Tólqujattaý qorytyndysy boıynsha almatylyq kásipkerler oıyn aıtty.
«Bul tólqujatqa qol qoıǵanymyzǵa qaramastan, biz árdaıym durys kóriktendirý talaptaryn ustanamyz. Bizde arnaıy qyzmetkerler bar, olar aýmaqty qadaǵalap otyrady. Basqa kompanıalardy da tazalyqty saqtaýǵa, aýmaǵyn retke keltirýge shaqyramyn, óıtkeni qalamyzdyń taza ári gúldengeni bárimizge mańyzdy», – dedi Sevalo kompanıasynyń menedjeri Syrym Ysqaqov.
«Tólqujatty túsindirý aıqyn jáne qoljetimdi boldy. Biz aýmaǵymyzdy taza ári uqypty ustaý úshin bar kúshimizdi salýǵa daıynbyz. Almaty turǵyndaryn qalanyń tazalyǵyn saqtaýǵa shaqyramyn», – dedi Mega Cars JSHS kompanıasynyń ókili Anton Ivanov.