Qalada 119 vaksınalaý pýnkti jumys isteıdi.
Almaty qalasynda bir táýlikte 2 695 adam koronavırýsqa qarsy vaksına saldyrdy. Bul týraly qalalyq qoǵamdyq densaýlyq saqtaý basqarmasy málim etti, dep habarlaıdy Almaty-akshamy.kz.
«3 aqpan kúni 2 695 almatylyq vaksına saldyrdy. Vaksına saldyrǵandar sany boıynsha Almaty qalasy aldyńǵy orynda. Ótken jyldyń 1 aqpany men bıylǵy 3 aqpan aralyǵynda qalada 1 074 642 turǵyn vaksınanyń birinshi komponentin, 1 035 787 adam ekinshi komponentin saldyrǵan. Onyń ishinde 124 174 adamnyń jasy 60-tan asqan», - delingen qalalyq qoǵamdyq densaýlyq saqtaý basqarmasynyń baspasóz qyzmetiniń habarlamasynda.
Búgingi tańda Pfizer (Comirnaty) kompanıasynyń ekpesin 44 720 adam saldyrdy. Onyń ishinde 2 323 júkti áıel, 9 838 bala emizetin ana jáne 32 569 jasóspirim bar.
«Búgingi tańda qalada medısınalyq uıymdarda 119 vaksınalaý pýnkti jumys isteıdi. 140 vaksınalaý brıgadasynda 520 medısına qyzmetkeri jumyldyrylǵan», - dep atap ótti basqarma mamandary.