Búginde Almaty qalasynyń juqpaly aýrýlar aýrýhanalarynda 5 963 adam jatyr, onyń ishinde 195 bala bar.
Óńirlik komýnıkasıalar qyzmetiniń brıfıńinde megapolıstiń Qoǵamdyq densaýlyq basqarmasynyń basshysy Narıman Tabynbaev Almatydaǵy epıdemıologıalyq ahýal týraly aıtty, dep habarlaıdy Almaty-akshamy.kz
Spıkerdiń aıtýynsha, 15 tamyzda qalada koronavırýstyq ınfeksıanyń 1 517 oqıǵasy (jergilikti) tirkeldi, onyń ishinde 1 429 jaǵdaı sımptomdy jáne 88-i sımptomsyz. 944 adam emdelip shyqty, 651 syrqat tústi. Búginde qoldanystaǵy ınfeksıalyq tósek-oryndar 63%-dy quraıdy.
«AMSK jáne Telemedısına ortalyǵynyń mobıldi toptary 13 221 pasıentti úıde baqylaýda, olardyń jeńil jáne ortasha aýyr dárejedegisi - 12 685, sımptomsyz - 535 adam», - dedi Narıman Tabynbaev.
Ol sondaı-aq aǵymdaǵy jyldyń 16 tamyzyndaǵy jaǵdaı boıynsha 817 196 adamǵa birinshi komponentpen, al 643 514 almatylyqqa ekinshi komponentpen egilgenin aıtty. Ótken táýlikte birinshi komponentpen 5 396 adamǵa, ekinshi komponentpen 5 273 adamǵa ekpe jasaldy.
Spıker KVI-men aýyratyn balalar sany arta túskenin aıtty. Qazir 195 bala aýrýhanada, 2 540-y úı jaǵdaıynda emdelýde.
«Úshinshi tolqyn órship turǵan kezde Almaty aýrýhanalardaǵy balalar sany 30-40-tan aspaıtyn. Shtammnyń qazirgi túrimen balalar jıi aýrýda. Ótken aptada balalardyń arasynda juqtyrý tipti órship ketti. Stasıonarlarda 245 naýqas bala boldy. Ókinishke oraı, qaıǵyly jaǵdaı da oryn aldy, 1 aılyq náreste qaıtys boldy. Koronavırýstyń jańa shtammy óte qaýipti ári juqpaly, balalar ony tez juqtyrady», - dedi Almaty QDB basshysy.
Narıman Tabynbaev Almatyǵa jetkizilgen Vero Cell vaksınasy týraly da aıtty.
«Bul preparatty qytaılyq Sinopharm kompanıasy shyǵarǵan. Bul kóptegen vaksınalar sıaqty ınaktıvti. Kórsetkishter, qarsy kórsetkishter birdeı. Vaksınanyń tıimdiligi 72% deńgeıde anyqtalady. Ol eki dozaly, ekinshi komponent birinshisinen 21 kún ótken soń salynady. Eleýli ózgerister tirkelmegen. Aýyrsyný, álsizdik, uıqyshyldyq bolýy múmkin. Vero Cell vaksınasynyń keri áseri joq jáne paıdaly. Almatyda úlken suranysqa ıe . Ótken táýlikte osy vaksınamen 270 adam egildi, qalanyń SOSO bul preparatqa suranys joǵary», - dedi Narıman Tabynbaev.