Almatyda jańa oqý jyly qarsańynda 980 oryndyq 3 zamanaýı jataqhana ashyldy.
2024 jyly 24 tamyzda jańa oqý jylynyń qarsańynda jeke ınvestısıa esebinen 980 oryndyq 3 jataqhana saltanatty túrde ashyldy. Ashylý saltanatyna QR Ǵylym jáne joǵary bilim mınıstri Saıasat Nurbek, Almaty qalasy ákiminiń orynbasary Azamat Qaldybekov, qoǵam belsendileri men qala jastary qatysty, dep habarlaıdy ashamnews.kz.
Jataqhanalar barlyq talapqa tolyqtaı saı. Munda turmysqa qajettiniń bári bar. Korpýsta stýdentterge arnalǵan kovorkıng aımaǵy, asqana jáne konferens zaly qarastyrylǵan.
Buǵan deıin Almaty qalasynyń ákimi Erbolat Dosaev jataqhana máselesi tikeleı baqylaýynda ekenin aıtyp, Almatyǵa oqýǵa kelgen stýdentterdiń joǵary bilim alýmen qatar, jaıly jataqhanada turýlaryn qamtamasyz etý kerektigin aıtqan bolatyn.
Ashylý saltanatyna qatysqan qala ákiminiń orynbasary Azamat Qaldybekov Almaty qalasynyń ákimi Erbolat Dosaevtyń quttyqtaý sózin oqydy:
«Stýdentter úıi – bul Almaty kartasyndaǵy jaı ǵana jańa nysan emes. Osyndaı jaǵdaıda turatyn árbir stýdent ózin úıindegideı sezinip, jańa ortaǵa ońaı beıimdelip, sapaly bilim alyp, qalanyń damýyna úles qosa alady. Aıta keterligi, bul jataqhanalar jeke qarajat esebinen salyndy, bul óz áleýeti ózine jetetin megapolıs úshin jaqsy tájirıbe», – dedi megapolıs basshysy quttyqtaý sózinde.
Sondaı-aq, Azamat Qaldybekov Almaty ákimdigi qazaqstandyq jáne sheteldik stýdentterdiń jaıly jaǵdaıda ómir súrýi úshin stýdenttik jataqhanalar qurylysyn jalǵastyrýdy kózdep otyrǵanyn aıtty. 2024 jyly 5025 oryndyq 10 nysandy, al 2025-2026 jyldary 34 myńnan astam oryndyq jataqhanalardy paıdalanýǵa berý josparlanǵan.
Esterińizge sala keteıik, jataqhana qurylysyn tıimdi úılestirý úshin stýdenttik jataqhanalar salý jónindegi jobalyq keńse jumys istep tur. Jobalyq keńseniń negizgi mindeti – Almaty qalasynyń aýmaǵynda jataqhanalar salý jáne stýdentterdi turǵyn úımen qamtamasyz etý boıynsha memlekettik baǵdarlamany iske asyrý úshin qolaıly jaǵdaılar jasaý. Jobalyq keńse ashylǵaly beri 120 áleýetti ınvestor júgindi, onyń 67-i qazir jumysqa kirisken, bul qoldaý kórsetý tetiginiń tartymdylyǵyn kórsetedi.
