Almatyda halyqaralyq Almaty Tech Cup 2025 chempıonaty bastaldy, dep habarlaıdy Aqshamnews.kz
Baıqaýǵa Qazaqstan, Úndistan, Túrkıa, Mońǵolıa, Túrikmenstan, Qyrǵyzstan jáne Ózbekstandy qosa alǵanda, 10 elden 3 000-nan astam jas ınjener men robototehnık qatysýda. Robototehnıka, ınjenerıa jáne dron jarystarynda baq synaıtyn 400 komandanyń ishinde 20-sy shetelden kelgen. Chempıonattyń basty júldesi – Almaty qalasy ákiminiń kýbogy eń kóp upaı jınaǵan komandaǵa beriledi.
Dron jarystary men robototehnıka saıystary ártúrli jastaǵy qatysýshylar úshin uıymdastyrylǵan – eń kishkentaıynan bastap joǵary synyp oqýshylaryna deıin. Úsh kún boıy baǵdarlamalaý, mehanıka jáne dron ushyrý sheberleri óz elin Hústonda (AQSH) ótetin álemdik chempıonat – FIRST Championship-te tanystyrý quqyǵy úshin jarysady. Jeńimpazdar negizgi júldeden bólek, Qazaqstannyń jetekshi joǵary oqý oryndarynyń bilim granttaryna ıe bolady.
Aıta keteıik, byltyr Almaty quramasy AQSH-tyń Dallas qalasynda ótken álem chempıonatynda úzdik ondyqqa engen bolatyn. Buǵan deıin Almatynyń jas ınjenerleri 2022 jyly Jenevada, 2023 jyly Sıngapýrda jáne 2024 jyly Afınada ótken álem chempıonattarynda úsh márte altyn medal jeńip aldy.
— “Robototehnıka, baǵdarlamalaý jáne ınjenerıa – erteńgi kúnniń mamandaryn daıarlaýdaǵy basty baǵyttar. Almaty Tech Cup sıaqty chempıonattar oqýshylarǵa tek tehnıkalyq daǵdylardy ǵana emes, sonymen qatar komandalyq jumys, synı oılaý jáne kóshbasshylyq qasıetterin damytýǵa kómektesedi. Qazaqstan 2017 jyldan bastap halyqaralyq robototehnıka chempıonattaryna qatysyp keledi jáne osy ýaqyt ishinde bizdiń oqýshylarymyz zor jetistikterge jetti. Qazaq jastarynyń áleýeti óte joǵary ekenin kórip otyrmyz. Bizdiń maqsatymyz – Almaty ákimdiginiń qoldaýymen balalardyń damýyna jaǵdaı jasaý. Almaty Tech Cup syndy chempıonattar bul baǵyttaǵy mańyzdy qural bolyp tabylady”, – dedi Almaty qalasy Bilim basqarmasynyń basshysy Saıran Saıfedenov.
Almaty Tech Cup 2025 – Ortalyq Azıadaǵy bıylǵy jyldyń eń iri ınjenerlik-tehnıkalyq oqıǵasy. Chempıonat «Atakent» kórme kesheniniń №11 pavılonynda ótýde. Baǵdarlamada dron jarystarynyń ASPAN Cyber Race, ASPAN Drone Competition, ASPAN Whoop Race jáne ASPAN Drone Race sıaqty baǵyttary bar. Sonymen qatar, ártúrli jastaǵy qatysýshylarǵa arnalǵan robototehnıka saıystary uıymdastyrylǵan:
• FIRST LEGO LEAGUE Discover (4-6 jas)
• FIRST LEGO LEAGUE Explore (6-12 jas)
• FIRST LEGO LEAGUE Challenge (12-16 jas)
• FIRST Tech Challenge (16-18 jas)
22 aqpanda irikteý kezeńderi ótse, fınaldyq oıyndar men marapattaý rásimi jeksenbi, 23 aqpanda ótedi. Chempıonat týraly tolyq aqparatty resmı saıttan alýǵa bolady: almatytechcup.kz