Boryshkerlerdiń bereshegi 3,5 mlrd teńgege jetken.
2023 jylǵa kólik salyǵyn tóleý merzimi bıyl 1 sáýirde aıaqtalady, dep habarlaıdy Almaty-akshamy.kz
Zańnamaǵa sáıkes, sot oryndaýshylary kólik salyǵyn tólemegen azamattardyń banktegi shottary men múlkin buǵattaýǵa quqyly.
"Salyqty esepteý kezinde 2023 jyly qoldanysta bolǵan 3 450 teńge mólsherindegi aılyq eseptik kórsetkish paıdalanylady. Kólikke salynatyn salyq somasyn kgd.gov.kz portalynda jáne "e–Salyq Azamat" mobıldi qosymshasynda kálkýlátordyń kómegimen derbes esepteýge bolady", - delingen habarlamada.
Sondaı-aq esep aıyrysý saldosyn aıqyndaý maqsatynda salyq organdary jyl saıyn tıisti jylǵa jeke tulǵalardyń kólik salyǵyn esepteıdi. Salyqtyń eseptelgen somalary boıynsha aqparat 2024 jylǵy 15 naýryzdan keıin Kaspı bank jáne Halyq bank mobıldi qosymshalaryn paıdalanýshylarǵa PUSH–habarlama túrinde jiberiledi.
Budan bólek salyq somasy týraly aqparat kgd.gov.kz portalynda "Jeke tulǵalar úshin aldaǵy tólemder" servısinde, sondaı-aq "e–Salyq Azamat" jáne Kaspı bank pen Halyq banktiń mobıldi qosymshalarynda jarıalanady. Mobıldi qosymshalardyń barlyq paıdalanýshysy kólik salyǵynyń 2023 jylǵa eseptelgen somalaryn kóredi jáne onyń tólemin jasaı alady.
Memlekettik kirister departamenti 2024 jylǵy 2 sáýirden bastap salyq somasyn ýaqytyly tólemegen júrgizýshilerge salyq bereshegi týraly habarlama joldaıdy.
1 AEK-ten (3450 teńge) astam bereshek somasy boıynsha habarlama tapsyrylǵannan keıin otyz jumys kúninen keıin jeke tulǵanyń bereshegin óndirip alý týraly salyq buıryǵy avtomatty túrde qalyptastyrylady jáne boryshkerge jiberiledi. Bereshek tapsyrylǵannan keıin 5 jumys kúninen keıin tólenbegen jaǵdaıda, salyq buıryǵy jeke sot oryndaýshylaryna májbúrlep óndirip alýǵa beriledi, dep eskertti vedomstvodaǵylar.
Júrgizýshilerdiń kólik salyǵy boıynsha bereshegi qansha?
MKD aqparatynsha, 2024 jylǵy 28 aqpandaǵy jaǵdaı boıynsha 539 241 jeke tulǵanyń múlik pen kólik salyǵy boıynsha 16,3 mlrd teńge bereshegi bar. Onyń ishinde bereshektiń negizgi somasy kólik salyǵyn – 14,9 mlrd teńgeni quraıdy.
Kólik salyǵyn tóleýden jaltarǵan avtokólik ıeleriniń eń kóp sany myna óńirlerde tirkelgen:
Almaty qalasy – 26 myń boryshker boıynsha bereshek 3,5 mlrd teńge;
Almaty oblysy – 24 myń boryshker boıynsha bereshek 2,2 mlrd teńge;
Astana qalasy – 20 myń boryshker boıynsha bereshegi 1,6 mlrd teńge.
"Zańnamaǵa sáıkes sot oryndaýshylary banktik shottar men múlikti buǵattaýǵa quqyly. Sondaı-aq, bereshek somasy 40 AEK-ten asqan kezde el aýmaǵynan shyǵýǵa tyıym salynýy múmkin", - dep málimdedi memlekettik kirister departamenti.
Sonymen qatar, jeke sot oryndaýshylary bereshekten bólek qaryz somasynyń 25%-ine deıingi mólsherde qosymsha aqy óndirip alady.
Osyǵan baılanysty departament qajetsiz shyǵyndar men problemalardy boldyrmaý úshin salyqty ýaqytyly tóleýge, al salyq bereshegi bolǵan jaǵdaıda jeke sot oryndaýshylaryna óndirip alýǵa salyq buıryǵy berilgen sátke deıin (mamyr aıynyń úshinshi onkúndigine deıin) salyq pen ósimpuldy tóleýge keńes beredi.