Almatyda jáne Qazaqstanda EKO baǵdarlamalarynyń sany turaqty túrde ósip keledi, buǵan memlekettik qoldaý jáne halyqty aqparattandyrýdyń joǵarylaýy yqpal etýde.
Bul týraly óńirlik komýnıkasıalar qyzmetiniń baspasóz konferensıasynda «Ekomed» klınıkasynyń reprodýktıvti mamany Aıgerim Ahmetova málimdedi, dep habarlaıdy aqshamnews.kz.
«Sońǵy tórt jylda «Ańsaǵan Sábı» baǵdarlamasy aıasynda 28 myń EKO sharasy jasalyp, sonyń arqasynda 10 myńnan astam bala dúnıege keldi. Almatyda bul baǵdarlama 562 áıeldi qamtysa, onyń 246-sy ana atandy», - dedi reprodýktolog.
Maman EKO-ǵa qyzyǵýshylyqtyń artýynyń negizgi sebepteriniń qatarynda tehnologıalardyń damýyn, kesh bosanýlardyń kóbeıýin jáne bedeýlik dıagnostıkasynyń jaqsarýyn ataıdy.
«Búgingi tańda Qazaqstandaǵy erli-zaıyptylardyń 16-17%-y bala kóterýde qıyndyqtarǵa tap bolady jáne kóp jaǵdaıda QRT olar úshin senimdi sheshimge aınalady. Almatyda EKO-ǵa mamandanǵan 11 emhana bar, bul qalany reprodýktıvti medısına ortalyǵyna aınaldyrady», - dedi Ahmetova.
Sondaı-aq spıker aldaǵy 5-10 jylda Almaty reprodýktıvti medısınanyń odan ári damýyn, jańa tehnologıalardyń engizilýin jáne EKO qoljetimdiligin keńeıtýdi kútetinin basa aıtty.
«Biz tegin EKO-ǵa kvotalardyń kóbeıýin jáne bedeýlikti emdeýdiń ınovasıalyq ádisterin engizýdi boljap otyrmyz. Qazaqstanda reprodýktıvti tehnologıalardy damytýda Almaty negizgi oryn alady», - dep túıindedi sózin Aıgerim Ahmetova.