Beınebaqylaý kameralary oqýshylardyń tamaqtaný sapasyn baqylaıtyn bolady
Balalar men jasóspirimderdiń densaýlyǵyn saqtaý men nyǵaıtýdyń eń ózekti máseleleriniń biri olardy sandyq jáne sapalyq jaǵynan fızıologıalyq jáne gıgıenalyq talaptarǵa jaýap beretin durys tamaqpen qamtamasyz etý bolyp tabylady, dep habarlaıdy almaty-akshamy.kz
Oqýshylardy durys ári sapaly teńdestirilgen tamaqpen qamtamasyz etý úshin Almatyda vedomstvoaralyq saraptama toby qurylady. Ol qala mektepterinde tamaqtanýdyń sapasy men tıimdi uıymdastyrylýyna júıeli monıtorıń júrgizedi. Bul týraly basqarma basshysy Lázzat Jylqybaeva habarlady. Kestege sáıkes, kúntizbelik jyl ishinde bilim berý salasynyń qyzmetkerlerinen, aýdan ákimderinen, depýtattardan, ata-analardan jáne Qazaq tamaqtaný akademıasynyń ókilderinen turatyn komısıa ókilderi qalanyń barlyq bilim berý uıymyn aralap shyǵady.
«Asqanany jalǵa alýshylarǵa beınebaqylaý kamerasyn ornatýdy mindetteý úshin qazir bilim berý uıymdarynyń basshylaryna tapsyrma berildi. 206 memlekettik mekteptiń asqanasyna kameralar ornatylǵan (qalada barlyǵy 215 memlekettik mektep bar). Bul vedomstvoaralyq komısıaǵa kez kelgen ýaqytta balalarǵa arnalǵan taǵamdardyń qalaı daıyndalatynyn kórýge múmkindik beredi. Búginde orta bilim berý uıymdarynda tamaqty 85 jalǵa alýshy qamtamasyz etedi. Qyzmet kórsetýshini bilim berý uıymdary QR Ǵylym jáne joǵary bilim mınıstrliginiń 2018 jylǵy 31 qazandaǵy buıryǵyna sáıkes konkýrstyq negizde tańdaıdy. Sonymen qatar, sońǵy ýaqytta jergilikti búdjetten mektep asqanasynyń materıaldyq-tehnıkalyq bazasyn jaqsartý úshin qarajat bólinip otyr», - dedi Bilim basqarmasynyń basshysy.
Esterińizge sala keteıik, Almaty qalasy ákimdiginiń sheshimimen 2022-23 oqý jylynyń 1 qyrkúıeginen bastap memlekettik orta bilim berý uıymdarynyń 1-4 synyp oqýshylary tegin tamaqpen qamtamasyz etiledi. 2023 jylǵa arnalǵan jalpy búdjet jergilikti búdjet esebinen 20,4 mlrd teńge boldy. Halyqtyń áleýmettik osal toptary sanatyndaǵy balalardy qosqanda, búginde 134 myńnan astam oqýshy tegin tamaqpen qamtylyp otyr.