2025 jyly Almaty qalasynyń aýmaǵynda úsh deńgeıli kógaldandyrý boıynsha aýqymdy jumys bastalady. Birinshi deńgeıde kógaldar men gúlzarlar, ekinshi deńgeıde butalar men sándik ósimdikter, al úshinshi deńgeıde iri aǵashtar otyrǵyzylady.
2025–2027 jyldarǵa arnalǵan tıisti búdjet jobasy aldaǵy Máslıhat sesıasynda qaralady. Bul týraly qalalyq Máslıhattyń baspasóz qyzmeti habarlady.
Jalpy, shamamen 17 myń iri aǵash otyrǵyzý josparlanǵan, onyń ishinde 15 myń aǵashtyń bıiktigi 4 metrden assa, 2 myń aǵashtyń bıiktigi 6 metrden asady.
Otyrǵyzý jumystary magıstraldy kósheler boıynda, saıabaqtarda, skverlerde, býlvarlarda jáne basqa da qoǵamdyq oryndarda júrgiziledi. Mundaı tásil tyǵyz qonystanǵan aýdandarda kóleńke men jasyl aımaqtardy tezirek qurýǵa múmkindik beredi.
Joba aıasynda aǵashtardy otyrǵyzý men kútip-baptaýdyń zamanaýı ádisteri qoldanylatyn bolady. Otyrǵyzýdan keıingi alǵashqy eki jylda júıeli kútim jasalady: tamshylatyp sýarý, avtomattandyrylǵan sýarý júıelerin ornatý, sondaı-aq aǵashtar men butalardy jergilikti jaǵdaılarǵa beıimdelgen mıneraldy tyńaıtqyshtarmen qorektendirý qarastyrylǵan. Bul olardyń jersinýin jedeldetedi.
Kógaldandyrý ekologıalyq jaǵdaıdy jaqsartýǵa jáne qalalyq ortanyń sapasyn arttyrýǵa baǵyttalǵan. İri aǵashtardy otyrǵyzý jasyl ınfraqurylymdy qalyptastyrý ýaqytyn qysqartyp, qala turǵyndary úshin jaıly jaǵdaı jasaıdy.