2025 jyly respýblıkalyq búdjetten áleýmettik mindettemelerdi oryndaýǵa 5,982 trln teńge bólingen. Bul ótken jylmen salystyrǵanda 14%-ǵa artyq. Bul týraly Almatyda ótken Óńirlik komýnıkasıalar qyzmetiniń brıfıńinde QR Eńbek jáne halyqty áleýmettik qorǵaý mınıstrligi Halyqty áleýmettik qorǵaý salasyndaǵy retteý jáne baqylaý komıtetiniń Almaty qalasy boıynsha departamentiniń basshysy Asqar Nıazov málimdedi, dep habarlaıdy aqshamnews.kz
A. Nıazovtyń aıtýynsha, búdjettiń eń kóp bóligi – 4,262 trln teńge – zeınetaqymen qamsyzdandyrýǵa baǵyttalǵan. Bul qarajat respýblıka boıynsha shamamen 2,5 mln zeınetkerdi qamtýǵa múmkindik beredi. Zeınetkerler sany ótken jylmen salystyrǵanda 77,8 myń adamǵa artqan.
Salystyrý úshin, 2023 jyly osy maqsattarǵa 3,752 trln teńge bólingen, onyń ishinde 438,5 mlrd teńge Almatydaǵy 252,8 myń zeınetkerdiń tólemin qamtamasyz etken.
Zeınetaqy mólsheri qalaı ózgerdi?
2025 jylǵy 1 qańtardan bastap:
- Eń tómengi bazalyq zeınetaqy 32 360 teńgege deıin ósedi.
- Eń joǵary bazalyq zeınetaqy 50 851 teńgege deıin ulǵaıady.
- Yntymaqty zeınetaqy 8,5%-ǵa ósedi, bul ınflásıa deńgeıinen 2%-ǵa joǵary.
Kópbalaly otbasylarǵa tólemder qalaı artty?
Balalardy qoldaý maqsatynda týýǵa baılanysty birjolǵy járdemaqy kóbeıtildi:
- 4 jáne odan kóp bala úshin ata-analar 232 596 teńgeniń ornyna 247 716 teńge alatyn bolady.
- Tórt balasy bar otbasylar úshin aı saıynǵy tólemder 63 030 teńgege deıin,
- On balasy bar otbasylar úshin 157 280 teńgege deıin ulǵaıdy.
Múgedektigi bar adamdardy qoldaý
Múgedektigi bar adamdarǵa arnalǵan tólemder de artty:
- I top úshin: 101 702 teńge,
- II top úshin: 81 362 teńge,
- III top úshin: 55 474 teńge.
Sonymen qatar, áleýmettik tólemderdi alatyn 2,3 mln adamǵa kómek kórsetý úshin 720 mlrd teńge qarastyrylǵan.
Áleýmettik shyǵystardyń úlesi
Qorytyndylaı kele, Asqar Nıazov 2025 jyly áleýmettik shyǵystar respýblıkalyq búdjettiń 26%-yn quraıtynyn aıtty. Barlyq áleýmettik mindettemeler ýaqtyly jáne tolyq kólemde oryndalatynyna sendirdi.