Almatyda 208,4 mlrd. teńgege 3287 nómirli 23 qonaq úıdiń qurylysy júrgizilip jatyr. 2024 jyly 7 qonaq úıdiń qurylysyn aıaqtaý josparlanǵan, qalǵan jobalar 2027 jylǵa deıin bitedi. Bul týraly Almaty qalasy týrızm basqarmasynyń basshysy Ǵalıa Toqseıitova málimdedi.
Onyń aıtýynsha, bul qalanyń nómirlik qoryn ulǵaıtýǵa, sonymen qatar týrıserdiń megapolıste bolý jaılylyǵyn arttyrýǵa múmkindik beredi.
Qazirgi ýaqytta megapolıste ártúrli sanattaǵy 345 qonaq úı bar. Almaty qalasynyń nómirlik qory 11 454 birlik, qonaq úı nysandarynyń birjolǵy syıymdylyǵy 21,8 myń orynnan asady.
2023 jyldyń qorytyndysy boıynsha Almatyda jeke ınvestısıalar esebinen 161 orynǵa arnalǵan 4 qonaq úı ınfraqurylymy nysany ashyldy. Olardyń ishinde: «Qazaq Auyl» meıramhanalyq kesheni bar eko-qonaq úı, «Grand Mildom», «Medeu camp», «Dami hotel» qonaq úıleri bar.