Almatyda ótken jylmen salystyrǵanda 2023 jyly aǵashtardyń qulaý faktileri 4 ese tómendedi, dep habarlaıdy almaty-akshamy.kz.
Jasyl jelekterdi ınventarızasıalaý nátıjeleri boıynsha Almatyda 84 myńnan astam apatty aǵash bar. Turǵyndardyń qaýipsizdigin qamtamasyz etý maqsatynda qala ákimdigi osyndaı aǵashtardy kesý boıynsha keshendi jumystar júrgizýde. Almatynyń ekologıa jáne qorshaǵan orta basqarmasynyń qyzmetkerleri bir aǵash kesilgen jerge ondaǵan jas kóshet otyrǵyzady.
Birinshi kezekte apatty jáne eski aǵashtar kesiledi. Sonyń arqasynda aǵashtar men butaqtardyń qulaýy edáýir tómendedi. Máselen, ótken jyly 200 – den astam qulaý faktisi tirkelgen bolsa, 2023 jyldyń basynan beri – 54 fakt, onyń ishinde 34 aǵash, qalǵany-butaqtar.
Almaty ákimdiginiń 2022 jylǵy jumys jospary boıynsha magıstraldy joldar boıynda, saıabaq aımaqtarynda jáne aýla ishindegi aýmaqtarda 5 myń apatty aǵash kesildi, onyń ornyna 50 myń jas kóshet otyrǵyzyldy.
Aǵymdaǵy jyly ekologıa jáne qorshaǵan orta basqarmasy bıyl josparlanǵan 16 myń aǵashtyń ornyna 13 myńnan astam aǵashty kesip tastady. Kesilgen aǵashtardyń ornyna 170 myńǵa jýyq kóshet otyrǵyzý josparlanýda.
Atap óterligi, apatty aǵashtardy kesý jumystaryn bastamas buryn, J. Jıembaev atyndaǵy Qazaq ósimdikti qorǵaý jáne karantın ǵylymı zertteý ınstıtýtnyń ǵylymı qyzmetkerlerin jáne ekobelsendilerdi tarta otyryp, apatty aǵashtar muqıat tekseriledi.