Qala turǵyndary úshin bıyl úsh myńnan astam sporttyq-buqaralyq is-sharalar ótkizildi.
Aıta keteıik, Almaty turǵyndary tek buqaralyq sportta ǵana emes, kásibı sport túrlerinde de erekshelendi. Almaty sportshylary respýblıka quramasynyń 30%-yn qurady - 772 adam. Bul derekterdi ÓKQ brıfıńi barysynda Almaty qalasy ákiminiń orynbasary Arman Qyryqbaev keltirdi, dep habarlaıdy Almaty-akshamy.kz.
Málimdelgendeı, Almatyda ártúrli menshik túrindegi 3 703 sport nysany jumys isteıdi. Búgingi tańda halyqtyń sporttyq ınfraqurylymmen qamtamasyz etilýi 72,5% -dy quraıdy.
«Sonymen qatar, «Almaty qalasyn damytýdyń 2025 jylǵa deıingi baǵdarlamasy jáne 2030 jylǵa deıingi orta merzimdi perspektıvalar» baǵdarlamasyn iske asyrý sheńberinde jańa sport nysandaryn ashý men jumys istep turǵan sport nysandaryn jańǵyrtýdy, onyń ishinde jyl saıyn 3 dene shynyqtyrý-saýyqtyrý keshenderin salýdy qamtıtyn qalanyń sporttyq ınfraqurylymyn jaqsartý jóninde sharalar qabyldaý kózdelgen»,-dep habarlady Arman Qyryqbaev.
Búginde qalada Jetisý aýdanynyń Kemel, Aınabulaq jáne Qulager shaǵyn aýdandarynda úsh DSHSK jumys isteıdi. Bıylǵy jyly jeke qarajat esebinen naýryz aıynda Bostandyq aýdanynda «Chempıon» sport kesheni ashyldy. Osy jyldyń sońyna deıin Zerdeli, Jas qanat jáne Alataý shaǵyn aýdandarynda taǵy úsh DSHSK iske qosylady.
Barlyq keshender kóp fýnksıaly bolyp tabylady, onda oıyn sport túrlerine, jekpe-jekke jáne sý sportyna arnalǵan ámbebap zal ornalasqan, sondaı-aq olar dene múmkindikteri shekteýli adamdarǵa beıimdelgen.
Almaty ákiminiń orynbasary búgingi tańda Aqjar, Shuǵyla, Saıaly shaǵyn aýdandarynda jáne Avıator stadıonynda taǵy tórt DSHSK jobalyq-smetalyq qujattama ázirlenip jatqanyn habarlady. Raıymbek dańǵyly boıynsha múmkindigi shekteýli jandarǵa arnalǵan sport ortalyǵynyń JSQ daıyndalýda.
Budan basqa, «Ortalyq stadıondy», «Medeý» SK muz aıdynyn jańǵyrtý jáne 5000 oryndyq jeńil atletıkalyq manej salý boıynsha jumystar júrgizilýde.
Almaty ákiminiń orynbasary Arman Qyryqbaev buqaralyq jáne joǵary jetistikter sportynyń damýyna toqtaldy. Mysaly, ı2023 jyly 3 myńǵa jýyq, onyń ishinde 35 iri halyqaralyq, sporttyq-buqaralyq is-shara ótkizildi. Olardyń arasynda: shahmattan Azıa chempıonaty, FIBA 3*3 Asia Zone Qualification, Almaty marafony, estetıkalyq toptyq gımnastıkadan Álem chempıonaty, kıokýshınkaı-kan karateden Álem chempıonaty, semserlesýden Azıa chempıonaty jáne t.b.
Bıylǵy jyly almatylyq sportshylar 373 medal jeńip aldy, QR IV qysqy jastar oıyndarynda jáne QR VI jazǵy spartakıadasynda jalpy komandalyq esepti birinshioryndy senimdi ıelendi. Hanchjoýda ótken Azıa oıyndarynda bizdiń sportshylar 26 medal jeńip aldy (1 – altyn, 4 – kúmis, 21 – qola). Bul Qazaqstannyń basqa óńirlerimen salystyrǵanda ekinshi kórsetkish.
Arman Qyryqbaev Táýelsiz Qazaqstan tarıhynda alǵash ret Almaty atynan qatysqan erkin kúresker Aıtmuhan Rızabek álem chempıonatynyń altyn medalin jeńip alǵanyn atap ótti.