Erbolat Dosaevtyń tapsyrmasy boıynsha Almatyda zańsyz qurylysqa baqylaý kúsheıtildi
Almatyda qala ákimi Erbolat Dosaevtyń tapsyrmasyna sáıkes zańsyz qurylysqa baqylaý kúsheıtildi. 2022 jyldyń basynan 2025 jyldyń mamyryna deıin 90 nysan - ruqsatsyz salynǵan qurylystar tolyq nemese jartylaı súrildi. Bul týraly Almaty qalasynyń qala qurylysy baqylaý basqarmasy habarlady.
Bıyldyń ózinde 20 zańsyz salynǵan qurylys buzyldy. Olardyń qatarynda turǵyn keshender, ákimshilik ǵımarattar, japsarlas salynǵan nysandar, dámhanalar, kólik jýý oryndary jáne basqa da qurylystar bar. Atap aıtqanda, iri nysandardyń ishinde «Mechta» taýnhaýsy, «KHAN» TÚK, sondaı-aq, Dostyq dańǵylyndaǵy 7 qabatty ákimshilik ǵımarat bar.
Erekshe nazar taýly aımaqtarǵa aýdarylyp otyr. Bul jerlerde zańsyz qurylysqa qarsy sharalar kúsheıtilgen. Qazirgi tańda 38 nysan boıynsha sot sheshimi shyǵarylyp, olardyń 13-i tolyq nemese ishinara súrildi. Taǵy 3 nysanda qurylys jumystary bastapqy kezeńinde toqtatylǵan.
Barlyq jumys sot sheshimi men resmı nusqamalar negizinde, sot oryndaýshylarynyń qatysýymen júrgizilýde. Zańsyz qurylysqa tosqaýyl qoıý jumystary jalǵasyp jatyr.