Almatyda zańsyz qurylysqa baqylaý kúsheıtildi
Almatyda qala ákimi Erbolat Dosaevtyń tapsyrmasymen zańsyz qurylysqa qarsy baqylaýdy jumystary kúsheıtilip jatyr. 2022 jyldyń basynan 2025 jyldyń mamyryna deıin qalada ruqsatsyz salynǵan 88 nysan tolyǵymen nemese jartylaı buzyldy. Bul týraly Almatynyń qala qurylysyn baqylaý basqarmasynan habarlady.
2025 jyly zańsyz salynǵan 18 ǵımarat súrildi. Olardyń ishinde turǵyn úı keshenderi, ákimshilik ǵımarattar, japsarjaılar, dámhanalar, kólik jýý oryndary jáne basqa da qurylystar bar. Eń iri nysandar qatarynda «Mechta» taýnhaýsy, «KHAN» TÚK jáne Dostyq dańǵylyndaǵy 7 qabatty ákimshilik ǵımarat bar.
Taýly aımaqtaǵy zańsyz qurylysqa erekshe nazar aýdaryldy. Munda 38 nysanǵa qatysty sot sheshimi shyqqan, olardyń 12-si tolyq nemese jartylaı buzylǵan.
- Taǵy 3 nysanda qurylys jumystary bastapqy kezeńde toqtatylǵan.
- Buzý jumystary tek sot sheshimi men tıisti qujattar negizinde, sot oryndaýshylarynyń qatysýymen júrgiziledi.
- Zańsyz qurylystardy anyqtaý jáne toqtatý jumystary jalǵasýda.
«Zańsyz qurylysqa baqylaýdy kúsheıtý – qazirgi kúnniń talaby. Qala ınfraqurylymyna, kólik jáne áleýmettik júıege júkteme artyp barady. Ruqsatsyz, beıbereket qurylys tek qalanyń damýyna emes, turǵyndardyń qaýipsizdigine de tikeleı qaýip tóndiredi. Ásirese, taýly aımaqtaǵy qurylysqa erekshe nazar aýdarý qajet. Bul aýmaqtar seısmıkalyq turǵydan álsiz ári qaýipti aımaqtar. Osyndaı jerlerdegi zań buzýshylyqtar óte aýyr saldarǵa ákelýi múmkin. Eń bastysy, barlyq súrý jumysy zań aıasynda sot sheshimimen ǵana júzege asyrylyp jatyr. Bul barshaǵa ortaq ereje men ádilettilik kepili. Almatyda atqarylyp jatqan bul sharalar basqa qalalar úshin de úlgi bola alady», - dedi ýrbanıst jáne qoǵam qaıratkeri Gúlmıra Baıǵabulova.