10 myń sharshy metrden astam jataqhana jáne 2 313 jeke turǵyn úı salyndy.
Bul týraly Óńirlik komýnıkasıalar qyzmetiniń baspasóz konferensıasy barysynda Almaty qalasy qalalyq josparlaý jáne ýrbanıstıka basqarmasynyń basshysy Almasqan Ahmedjanov málimdedi, dep habarlaıdy Almaty-akshamy.kz
Ol pandemıanyń qıyn kezeńinde paıdalanýǵa beriletin turǵyn úı kólemi tómendep qana qoımaı, tipti 8%-ǵa óskenin aıtty.
Buǵan bas sáýletshi aıtqan basqarmanyń málimetteri dálel bola alady. Aǵymdaǵy jyldyń 11 aıynda komersıalyq qurylys esebinen 13 322 páter jáne búdjet esebinen 1 326 páter paıdalanýǵa berildi.
Sondaı-aq, 10 myń sharshy metrden astam jataqhana jáne 2 313 jeke turǵyn úı salyndy.
A. Ahmedjanov turǵyn úıdiń qoljetimdiligin arttyrý Memleket basshysy qoıǵan basym mindetterdiń biri ekenin eske saldy. Sondyqtan Almatyda pandemıa kezinde turǵyn úı qurylysynyń azaıǵany daǵdarysqa qarsy sharalardyń ýaqtylyǵy men ózektiligin kórsetedi.
Sondaı-aq, ol jańa turǵyn úıler negizinen qalaǵa qosylǵan aýmaqtarda salynatynyn, bul «Jańa Almatynyń» damýyna yqpal etetinin habarlady.
Bas arhıtektor atap ótkendeı, jańa turǵyn úımen birge qalada áleýmettik ınfraqurylym qurylyp, mektepter men balabaqshalar salynýda. Qazirgi ýaqytta megapolıste 12,5 myńnan astam oqýshy ornyna arnalǵan segiz memlekettik mektep salynýda. Onyń úsheýin (5 myńnan astam orynǵa) jyl sońyna deıin tapsyrý josparlanǵan.
«Oqý jylynyń basynan beri 2 656 oryndy 13 jekemenshik mektep ashyldy. Jyl sońyna deıin 8 263 oryndy 17 japsarlas qurylys salý josparlanǵan bolatyn. Olardyń 11-ine balalar partaǵa otyrdy. Osylaısha, jyl sońyna deıin 16 myńnan astam jańa oqý orny ashylady», - dedi A. Ahmedjanov.
Sonymen qatar, Almatyda úsh memlekettik balabaqshanyń qurylysy aıaqtaldy (360 oryndy), 72 jeke balabaqsha ashyldy (4,7 myń oryndy).
Qala ákimi Baqytjan Saǵyntaev «Almaty – 2050» Strategıasynda belgilengen «shetsiz qala» qaǵıdatyn ustana otyryp, turǵyn úı sharshy metrlerin zamanaýı mekteptermen, balabaqshalarmen jáne densaýlyq saqtaý obektilerimen birge engizý mindetin alǵa qoıǵan bolatyn.