Radıoelektronıka jáne baılanys áskerı-ınjenerlik ınstıtýtynda mektep oqýshylaryna arnalǵan ashyq esik kúni ótti.
Jasóspirimderge áskerı ınstıtýtqa qabyldaý tártibi jáne munda oqýdyń artyqshylyqtary jaıynda aıtyldy, dep habarlaıdy Almaty-akshamy.kz Qorǵanys mınıstrliginiń saıtyna silteme jasap.
Joǵary oqý ornynyń kafedralaryna barǵan kezde oqytýshylar ár mamandyqtyń ózine tán erekshelikteri týraly jan-jaqty áńgimelep berdi. Balalar oqý synyptaryn aralap, kazarmada, sport zalynda jáne asqanada boldy.
«Bizdiń joǵary oqý ornynda bes ınjenerlik-tehnıkalyq mamandyq boıynsha ofıserlerdi oqytady. Búgingi tańda mundaı sala mamandary tek Qarýly Kúshterde ǵana emes, sonymen qatar ekonomıkanyń naqty sektorynda da suranysqa ıe. Sondyqtan bizdiń ınstıtýtta bilim alý múmkindigin jiberip almańdar», - dedi oqýshylarmen kezdesý barysynda Radıoelektronıka jáne baılanys áskerı-ınjenerlik ınstıtýtynyń bastyǵy polkovnık Qaırat Dáýitov.
Oqýshylarǵa oqý-jaýyngerlik tehnıka men atys qarýy úlgileriniń kórmesi uıymdastyryldy. Nusqaýshylar avtomatty bólshektep-qurastyrý ádisterin kórsetti, jalpyáskerı qorǵanys jıyntyǵyn kıý erejelerimen tanystyrdy.
«Bala kúnimnen áskerı adam bolýdy armandaımyn. Búgin men kóptegen qyzyqty jáne paıdaly aqparat aldym. Osy oqý ornyna túsemin», – dedi № 95-shi jalpy bilim berý mektebi "Jas sarbaz" 9-synybynyń oqýshysy Artem Smırnov.
Joǵary oqý ornyn aralaý baǵdarlamasy boıynsha armıa qoıan-qoltyq urysynyń elementteri jáne áskerı ansámbl ártisteriniń óneri kórsetildi.
Oqýshylar uıymdastyrýshylarǵa tanymdyq ekskýrsıa úshin rızashylyǵyn bildirdi. Bul olardyń keıbiri úshin mamandyq tańdaýda mańyzdy qadam bolýy múmkin.