Almatyda 18 eldiń shahmatshylary Azıa chempıony ataǵy men FIDE-2023 álem chempıonatyna joldama alý úshin kúresýde
Keshe Almaty qalasynda Azıa chempıony ataǵy úshin ıntellektýaldyq tartys bastaldy. Jeksenbi kúni Balýan Sholaq atyndaǵy Sport saraıynda shahmattan Azıa qurlyqtyq chempıonatynyń resmı ashylý saltanaty men birinshi týry ótti, dep habarlaıdy Almaty-akshamy.kz.
Saltanatty sharany týrnırdiń barlyq qatysýshylaryn quttyqtap, sáttilik tilegen Almaty qalasy ákiminiń orynbasary Arman Qyryqbaev, Qazaqstan shahmat federasıasynyń (QSHF) prezıdenti, Freedom Holding Corp bas dırektory Tımýr Týrlov jáne Azıa shahmat federasıasynyń bas hatshysy Hısham Al-Taher ashty.
Tımýr Týrlov Qazaqstan 2023 jyly memleket basshysynyń qoldaýynyń arqasynda shahmattyń naǵyz ortalyǵyna aınalǵanyn atap ótti.
«Halyqaralyq jarystardy jıi ótkizý elimizde shahmatty damytýǵa ári bizdiń shahmat federasıasynyń jumysyn kúsheıtýge kómektesedi, osylaısha bolashaqta budan da kóp chempıondar, myqty shahmatshylar shyǵady», – dedi ol.
QSHF prezıdenti shahmattan Azıa qurlyqtyq chempıonatynda kórermenderdi qyzyqty ıntellektýaldyq oıyndar kútip turǵanyna jáne týrnır ondaǵan, júzdegen myń qazaqstandyq balalardy osy tamasha oıyndy belsendi úırenýge shabyttandyratynyna senim bildirdi.
Óz kezeginde Hısham Al-Taher Qazaqstan prezıdenti Qasym-Jomart Toqaevqa elimizdegi shahmatty damytýǵa qoldaý kórsetkeni úshin, Almaty qalasynyń ákimi Erbolat Dosaev pen Tımýr Týrlovqa chempıonatty osyndaı joǵary deńgeıde uıymdastyrǵany úshin alǵysyn bildirdi.
Ashylý saltanatynan keıin 1 týr ótti. Open-chempıonattyń birinshi týrynyń qorytyndysy boıynsha qazaqstandyq grosmeıster Rınat Jumabaev qarsylasyna az da bolsa múmkindik bermeı taza jeńiske jetti. Sonymen qatar Murtas Qajgaleev, Denıs Mahnev, Nógerbek Qazybek jáne basqalar jeńimpaz atandy.
Áıelder chempıonatynyń birinshi týrynyń qorytyndysy boıynsha Qazaqstandyq shahmatshylar: Arnash Baýyrjan, Lıa Qurmanǵalıeva, Ksenıa Balabaeva, Amına Qaıyrbekova jeńiske jetti.
Eske salaıyq, shahmattan erler arasyndaǵy ashyq birinshilik pen áıelder arasyndaǵy chempıonatty qamtıtyn Azıa qurlyqtyq chempıonaty Shveısarıa júıesi boıynsha, FIDE erejesine sáıkes 9 týrdan turady. Oǵan Azıanyń 18 elinen 128 myqty oıynshy qatysýda. Jarys aǵymdaǵy jyldyń 12 maýsymyna deıin jalǵasady. Sharanyń júlde qory 100 000 AQSH dollaryn quraıdy.
Ashyq chempıonattyń tórt jeńimpazy jáne áıelder chempıonatynyń eki jeńimpazy bıylǵy jyldyń 29 shildesi men 25 tamyzy aralyǵynda Bakýde ótetin FIDE–2023 álem chempıonatyna qatysý quqyǵyna ıe bolady. Álem kýbogynyń jeńimpazdary shahmat álemindegi eń joǵary ataq – shahmattan álem chempıony ataǵy úshin talasady.
Shahmattan Azıa qurlyqtyq chempıonatyn uıymdastyrýshylar – Qazaqstan Respýblıkasy Mádenıet jáne sport mınıstrligi, Azıa shahmat federasıasy, Almaty qalasy ákimdiginiń qoldaýymen Qazaqstan shahmat federasıasy. Týrnırdiń bas seriktesi – Freedom Holding Corp.