Zańsyz aǵash kesken qurylys kompanıasyna qatysty qylmystyq is qozǵaldy.
Almaty qalalyq ekologıa jáne qorshaǵan orta basqarmasynyń málimetinshe, «Qazaq Stroy Almaty» JSHS 17 gektar jerdegi jasyl jelekti otap tastaǵan, dep habarlaıdy Almaty-akshamy.kz
Alataý aýdany, Daraboz shaǵynaýdanynda jalpy kólemi 17 ga jer ýchaskesinde aǵash kesýge jáne qurylys júrgizýge ruqsat berilmese de mundaǵy 176 aǵash jáne 40-tan astam jabaıy ósken butalar (barlyǵy 216 túp) kesilgen.
«Osyǵan baılanysty Basqarma mamandandyrylǵan tabıǵat qorǵaý prokýratýrasy jáne tabıǵat qorǵaý polısıasynyń qyzmetkerlerimen birlesip keltirilgen zalaldy esepteıdi ári jasyl jelekterdi tekserý aktisin jasaıdy. Anyqtalǵan fakti boıynsha Almaty qalasy Alataý aýdanynyń polısıa basqarmasy QR Qylmystyq kodeksiniń 340-baby boıynsha qylmystyq is qozǵady», - dep habarlady ákimdiktiń baspasóz qyzmeti.
Kompanıa 2023 jylǵy maýsymnan bastap «Memlekettik qyzmetter» portaly arqyly (Elicense.kz) Almaty qalasynyń ekologıa jáne qorshaǵan orta basqarmasyna «Qazaq Stroy Almaty» JSHS-nen turǵyn úı kesheni qurylysynyń aýmaǵynda aǵashtardy kesýge ruqsat alý úshin 6 ret ótinim bergen. Barlyq ótinimderge usynylǵan materıaldarda jasyl jelekter týraly aqparattyń mazmuny bar saraptama qorytyndysynyń bolmaýy sebebinen aǵashtardy kesýge ruqsat berilmedi. Aǵashtardy kesýge ruqsat berý memlekettik qyzmet bolyp tabylady. Qajetti qujattar paketi tolyq usynylǵan jaǵdaıda ruqsat berýden bas tartý múmkin emes.
«Bekitilgen jáne kelisilgen qala qurylysy qujattamasynda (Memlekettik vedomstvodan tys saraptama) kózdelgen qurylys qyzmetin, qurylys-montaj jumystaryn júzege asyrý úshin jaǵdaılardy qamtamasyz etý jónindegi qujattardyń tolyq paketiniń usynylýyna baılanysty 2023 jylǵy 11 jeltoqsanda Basqarma joǵaryda kórsetilgen mekenjaı boıynsha kesýge ruqsat berilgen 2797 dana aǵashtyń ornyna 27 970 dana kóleminde ótemdik jasyl jelek otyrǵyzatyn bolady. Basqarma sonymen qatar 100 dana jasyl jelekterdi basqa jerge otyrǵyzý jónindegi jumystarǵa kelisim berdi», - delingen habarlamada.
Kóshetterdi otyrǵyzý «Almaty qalasynyń jasyl jelekterin kútip-ustaý jáne qorǵaý qaǵıdalarynyń» barlyq talaptaryn saqtaı otyryp, bıiktigi keminde 2,5 metr bolatyn jalpy paıdalanymdaǵy jerlerde júrgiziledi.