Almaly aýdandyq polısıa basqarmasynyń málimetinshe, D.esimdi azamat kem degende 17 qala turǵynyn aldady degen kúdikke ilindi, dep habarlaıdy Almaty-akshamy.kz.
«Aıyptalýshy azamattarǵa aı saıyn qajetti somany tólep otyrýǵa ýáde berip, avtokólikti nesıege rásimdeýge kóndirgeni belgili boldy. Aqsha men kólikti alǵan azamat kólikti úshinshi adamdarǵa qaıta satyp, qarajatty óz qalaýy boıynsha jumsaǵan. Asa iri kólemdegi alaıaqtyq deregine sáıkes QR QK-niń 190-baby 4-bóligi (Alaıaqtyq) boıynsha sotqa deıingi tergeý bastaldy. Tergeý barysynda kúdiktige qatysty qamaýǵa alý túrindegi bultartpaý sharasy tańdaldy. Zardap shekkender kóp bolýy múmkin ekenin joqqa shyǵarmaımyz. Sondyqtan, osy adamnyń áreketinen zardap shekken azamattardy myna telefondar arqyly habarlasýǵa shaqyramyz: 8-705-555-77-63; 8-775-747-77-78 jáne 8-778-591-91-35», – deıdi Almaly aýdandyq polısıa basqarmasynyń bastyǵy Oljas Sháripov.
QR QK-niń 201 babyna sáıkes ózge aqparat tergeý múddesine oraı jarıa etilmeıdi. QR Konstıtýsıasynyń 77 baby 3-bólimi, 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.