Sebebi, olardyń ıeleri aıyppul tólemegen.
Osy kúnderi Almatyda aıyppul tólemegenderge qatysty respýblıkalyq is-shara júrgizilýde, dep habarlaıdy Almaty-akshamy.kz.
“Quqyq buzýshylyqqa múldem tózbeýshilik” qaǵıdattaryn, jasalǵan quqyq buzýshylyq úshin jazanyń bultartpastyǵyn qamtamasyz etý jáne salynǵan ákimshilik aıyppuldardy óndirý tıimdiligin arttyrý maqsatynda Almaty polısıasy “Boryshker” jedel aldyn alý is-sharasyn ótkizip jatyr.
«İs-sharaǵa MKD qyzmetkerleri men jeke sot oryndaýshylarynyń óńirlik palatasynyń sot oryndaýshylary tartyldy. Avtokólikter qarqyndy júretin oryndarǵa patrúldik polısıanyń kólikteri jumyldyrylǵan. Avtomattandyrylǵan aqparattyq júıelerdiń múmkindikteri de keńinen qoldanylady, onyń ishinde “Qorǵaý – Qaýipti júrgizýshi”, ol salynǵan ákimshilik aıyppuldar boıynsha bereshegi bar boryshkerlerdi avtomatty túrde anyqtaıdy», – dedi Almaty qalalyq PD ákimshilik polısıa basqarmasynyń bastyǵy Asqat Qulbaev.
Tártip buzýshynyń kóligi mamandandyrylǵan aıyppul turaǵyna ornalastyrylady.
«Tek bizdiń aýdanda is-shara jumystary bastalǵaly beri kólik ıeleriniń alıment, aıyppul, salyq boıynsha qaryzdary bar 26 avtokólik ustalyp, mamandandyrylǵan avtoturaqqa ornalastyryldy. Olardyń kópshiligi qaryzdaryn ótedi. Aıtpaqshy, qalanyń perımetri boıynsha ekologıalyq beketterde bizdiń bólimshe, MKD jáne JSO qyzmetkerlerinen mobıldi toptar ornalastyrylǵan. Bul maksımaldy kólik qozǵalysyn qamtýǵa jáne kólikte qaryzdyń bar-joǵyn tekserýge múmkindik beredi», – dedi Alataý aýdandyq PB ÁPB-niń ákimshilik tájirıbe bóliminiń bastyǵy Ernur Ortaev.
Ákimshilik tájirıbe bóliminiń málimetinshe, is-shara bastalǵaly 131 kólik ustaldy jáne aıyppul turaǵyna qoıyldy. Sonymen qatar jalǵan memlekettik nómirmen júrgen 8 kólik quraly, júrgizýshi kýáliginsiz kólikti basqarǵan 61 adam, sondaı-aq mundaı quqyqtan aıyrylǵan 5 adam ustaldy.