Almatydaǵy psıhıkalyq densaýlyq ortalyǵynda túrli psıhıkalyq jáne narkologıalyq keselge shaldyqqan 11 myń turǵyn tirkeýde tur. Bul týraly ortalyqtyń bas dırektory Sapar Rahmensheev málim etti, dep habarlaıdy Almaty-akshamy.kz QazAqparatqa silteme jasap.
Spıkerdiń aıtýynsha, ortalyqta emdelýshilerdiń ýaıymnan degbiri qashyp, uıqysynan aıyrylǵan naýqastar tamaq jeýden bas tartady. Adam tez júdeıdi. Nátıjesinde naýqastyń aǵzasy álsirep, ary qaraı anoreksıa, kaheksıa sekildi sozylmaly aýrýlarǵa shaldyǵady.
- Kúızelistiń túri kóp. Sonyń biri kúızelisten jabyrqap, ómirden túńilgende, araq iship, esirtkige áýes bolyp, esti ýlaıtyn zattarǵa úıir bolady. Olar óziniń janyn jegideı mazalaǵan syrqattan osylaı qutylamyn dep úmittenedi. Sonymen birge únemi kúlip júrgen adamdarda da kúızelis bolady. Olar óziniń jan dúnıesin alaı-túleı etken mazasyn kúıdi jasyrý úshin jymıyp júredi, - deıdi dáriger.
Ol syrqattan emdelýdiń jalǵyz joly kásibı mamandardyń kómegine júginý qajet ekenin aıtty.
- Kúızelisi asqynǵan kezde, naýqas adam uzaq ýaqyt boıy uıqysynan aıyrylady. Mıdyń tynymsyz qyzmet etýi saldarynan naýqas túrli daýystardy estıdi. Keıbireýler ózin basqa álemde júrgendeı elestetedi. Olar shynaıy ómirden jyraqtap ketedi. Adamnyń minez-qulqynda, sóılegen sózi de ózgeredi. Mundaı aýytqýshylyq baıqalǵan kezde, uıqysyzdyq mazalaǵanda, bizdiń ortalyqqa kelý kerek. Kásibı mamandar psıhologıalyq kómek kórsetedi, - dep sózin túıindedi Sapar Rahmensheev.
Aıta keteıik, Almaty qalasynyń psıhıkalyq densaýlyq ortalyǵynda senim telefony táýlik boıy jumys isteıdi. 8-722- 376-5660, 8-708-983-28-63, 1303 nómerlerin terip, klınıkalyq psıhologtardan keńes alýǵa bolady.