Sol úshin olar jazalanyp ta úlgerdi. Almatyda kólikterdi turaqqa qoıý erejelerin buzý derekterin anyqtaý jumystary jalǵasyp jatyr.
Polıseıler evakýatorlardyń kómegimen zańsyz qoıylǵan kólikti mamandandyrylǵan aıyppul turaǵyna jetkizedi, dep habarlaıdy Almaty-akshamy.kz.
"Jyl basynan beri avtoturaq erejesin buzǵan 9963 adam jaýapkershilikke tartyldy. “Aıaldaýǵa tyıym salynady” jáne “Turaqqa qoıýǵa tyıym salynady” belgilerimen belgilenbegen oryndarǵa kólik qoıatyn júrgizýshilerdi anyqtaý maqsatynda jergilikti jerlerde turaqty túrde is-shara júrgizilýde. Sonymen qatar aldyńǵy sheptegi bólimshelerdiń qyzmetkerleri avtobýstardyń júrýin qıyndatyp, keptelistiń paıda bolýyna yqpal etetin qoǵamdyq kólik aıaldamalarynda kólikterdi turaqqa qoıý sıaqty óreskel buzýshylyqtardy anyqtaýda jáne joıýda. Tájirıbe kórsetkendeı, reıdter men is-sharalardy ótkizý qaladaǵy kólikterdiń ótkizý qabiletine, júrgizýshi tártibi men júrgizý mádenıetin arttyrýǵa oń áserin tıgizedi", – dedi Almaty qalalyq PD jergilikti polısıa qyzmeti basqarmasynyń bastyǵy Serik Shýmaev.
Jergilikti reıdterdi ótkizý kezinde polıseıler jol qozǵalysy erejelerin buzý týraly habarlaǵan múddeli azamattardyń sıgnaldaryn belsendi paıdalanady.
"Qalamyzdyń taǵdyryna beı-jaı qaramaıtyn osyndaı belsendilerge alǵysym sheksiz. Sondaı-aq, barsha azamattardy jol qozǵalysy erejelerin qatań saqtaýǵa shaqyramyz. Zańdy jáne tártipti saqtaýdy ózimizden bastaý kerek, sondyqtan zańǵa baǵyný óte mańyzdy, bul qaladaǵy jol qaýipsizdigin qamtamasyz etýge zor úlesimizdi qosýdy bildiredi", – dedi Shýmaev.