Almatynyń sanıtarlyq dárigerleri osy kúzde respıratorlyq aýrýlardyń beleń alǵanyn atap ótti. Bul týraly Óńirlik komýnıkasıalar qyzmetiniń baspasóz konferensıasynda Almaty qalasy sanıtarlyq-epıdemıologıalyq baqylaý departamenti basshysynyń orynbasary Sádýaqas Baıǵabylov málimdedi dep habarlaıdy almaty-akshamy.kz
Sádýaqas Baıǵabylov almatylyqtardy sanıtarlyq-epıdemıologıalyq qaýipsizdik sharalaryn saqtaýdy jalǵastyrýǵa shaqyrdy, óıtkeni shekaralas elderde COVID-19 jaǵdaıy nasharlaýda. Sonymen qatar, koronavırýs JRVI retinde maskırovka jasaı alady.
«Almatyda epıdemıologıalyq jaǵdaı optımısik senarı boıynsha damyp kele jatqanyna qaramastan, jeke qorǵanys quraldaryn nazardan tys qaldyrmaý kerek, qoldy jıi jýý, antıseptıktermen óńdeý, qashyqtyqty saqtaý, úı-jaılardy jeldetý qajet. Vaksınasıa ózińizdi qorǵaýǵa kómektesedi. Biz «sary aımaqta»ekenimizdi este ustaǵan jón, bul koronavırýspen kúres sharalarynyń saqtalýyn baqylaýdy kúsheıtýdi bildiredi», - dedi SEBD basshysynyń orynbasary.
Sanıtarlyq dárigerlerdiń aıtýynsha, 1 qyrkúıekten bastap azamattar arasynda JRVI-diń 74 426 jaǵdaıy tirkelgen. Ótken jyly osy kezeńde barlyǵy 17 731 jaǵdaı boldy. S. Baıǵabylov JRVI adamdardy koronavırýsqa osal etetinin atap ótti.
Aıta ketsek, Almatyda tumaý tirkelgen joq. Osy ýaqytta qalada koronavırýsqa jáne tumaýǵa qarsy belsendi vaksınalaný jalǵasýda. Qazirdiń ózinde 105 114 turǵyn tumaýǵa qarsy ekpe aldy, olardyń basym bóligi búdjet qarajaty esebinen egildi.
«Koronavırýsqa qarsy ımmýndaý naýqany jalǵasýda. Almatyda ujymdyq ımýnıtettiń deńgeıi 55,2%-dy quraıdy, onyń ishinde vaksınasıalanǵan azamattardyń 47,2%-y jáne jyl basynan beri aýyryp jazylǵan adamdardyń 8%-y. Bizge senimdi ımýndyq qabat qalyptastyryp, halyqtyń 80% vaksınasıalaý qajet», - dedi Sádýaqas Baıǵabylov.
SEBD basshysynyń orynbasary vaksınasıalanbaǵan azamattardyń koronavırýsty juqtyrý qaýpi áli de bar ekenin aıtty. Mysaly, bir apta ishinde KVI-men aýyrǵan 1033 adamnyń 194-i egilgen, qalǵan 81%-y egilmegen.
Epıdemıologtar kóbinese vaksınasıadan jaltarǵan azamattar juqtyrady dep sanaıdy. Taldaý kórsetkendeı, juqtyrǵandardyń 30% - dan astamy – ózin-ózi jumyspen qamtyǵandar nemese jumyssyzdar, 20%-dan astamy – zeınetkerler, 19,5%-y – kásiporyn qyzmetkerleri. Juqtyrǵan oqýshylar sany 14% jáne mektep jasyna deıingi balalar – 6% quraıdy.
Aıta ketsek, oqýshylardyń 94%-y synypta emes, úıde eresek otbasy múshelerimen baılanysta bolǵan.
Negizgi juqtyrý oryndary burynǵysynsha saýda obektileri – 28%, qoǵamdyq kólik – 21,4%, otbasylardaǵy baılanystar – 22,3% jáne bazarlar – 8% bolyp qalýda.
Sádýaqas Baıǵabylov vaksınalaný adamdy koronavırýstyq ınfeksıadan qorǵaýǵa kepildik bere almaıtynyn, biraq derttiń jeńil túrde ótetinin atap ótti. Vaksınalaný – densaýlyqty saqtaýdyń tıimdi jol. Eske salsaq, almatylyqtar qaladaǵy 137 egý pýnktiniń birin baryp, tegin ekpe ala alady.