Bıylǵy oqý jylynda Almatyda birinshi synypqa 32 myńǵa jýyq bala bardy. Qala mektepterinde barlyǵy 317 myń oqýshy bilim alatyn bolady. Aǵymdaǵy jyly bastaýysh synyp oqýshylary tegin ystyq tamaqpen qamtamasyz etiledi, dep habarlaıdy Almaty-akshamy.kz.
Bilim kúni birden segiz jańa mektep esigin aıqara ashty, olardyń tórteýi – memlekettik. Bul oqý oryndary "Mádenıet", "Qalqaman", "Saıaly", "Tomırıs" shaǵynaýdandarynda ornalasqan jáne 6600 orynǵa eseptelgen. Qalǵan tórt mektep (1470 oryn) jeke ınvestısıa esebinen salyndy. Sondaı-aq, búginde №191, 146, 125 mektepterge japsarlas qurylys jumystary aıaqtaldy, bul oqýshylar sanyn 875 orynǵa ulǵaıtýǵa múmkindik berdi.
Bıylǵy oqý jylynan bastap Almaty mektepteri tolyǵymen bir nemese eki aýysymmen bilim alýǵa tolyq kóshedi. "Mádenıet" shaǵynaýdanynda ashylǵan 1500 oryndy mektep qaladaǵy jalǵyz úsh aýysymdy mektep máselesin sheshýge múmkindik berdi. Qalada barlyǵy 210 memlekettik jáne 91 jeke menshik mektep jumys isteıdi. Jyl sońyna deıin bes memlekettik jáne eki jeke menshik mektepti paıdalanýǵa berý, sondaı-aq jumys istep turǵan oqý oryndarynyń janyndaǵy úsh qosalqy nysannyń qurylysyn aıaqtaý josparlanýda.
Bıyl az qamtylǵan otbasylardan shyqqan balalardy mektepke daıyndaý aıasynda jergilikti búdjetten 847 mln teńge bólindi. Nátıjesinde Almatynyń 20 myńǵa jýyq oqýshysy mektep formasy men keńse kerek-jaraqtaryn satyp alý úshin «Jappaı oqytý» qorynan 43 myń teńge somasynda qarjy aldy. Demeýshilerdiń arqasynda «mektepke jol shekarasyz jaqsylyq» respýblıkalyq aksıasy aıasynda muqtaj otbasylardan shyqqan 4108 balaǵa jalpy somasy 70,6 mln teńgege kómek kórsetildi.