Bul sharalarǵa 50-ge jýyq erikti qatysyp jatyr.
Jańa jyl qarsańynda qaıyrymdylyq sharalary júıeli túrde ótkizilip turady. Jyl saıyn volonterler halyqtyń ártúrli sanattaryn qamtýǵa tyrysady. Osy baǵytta atqarylyp jatqan jumystarǵa Óńirlik komýnıkasıalar qyzmeti alańynda «QAMQOR CHARITY» qoǵamdyq qorynyń tóraıymy, Almaty qalasy ákimi janyndaǵy jastar keńesiniń múshesi Baǵdat Anarbaeva men Almaty qalasy Jastar resýrstyq ortalyqtarymen jumys bóliminiń basshysy Janar Arnaeva toqtaldy, dep habarlaıdy Almaty-akshamy.kz.
Jańa jyl qarsańynla volonterler balalar men jalǵyzbasty zeınetkerlerdiń qaýanyshyn bólisedi. Almatynyń balalar úıinde demeýshilerdiń qoldaýymen Aıaz ataǵa jazylǵan hattar negizinde balalarǵa syılyqtar beriledi.
«Jańa jyl – eń aldymen otbasylyq mereke. Sondyqtan munda kóptegen volonterlik uıymdar muqtaj otbasylardy quttyqtaıdy, biraq bizdiń uıym bul merekeni otbasymen birge toılaýǵa múmkindigi joq adamdarǵa qamtýdy maqsat etip otyr. Sondyqtan osy quttyqtaý aıasynda negizgi sanattar retinde biz jalǵyzbasty zeınetkerlerdi, sondaı-aq ata-anasynyń qamqorlyǵynsyz qalǵan balalardy tańdadyq», - dedi «QAMQOR CHARITY» QQ tóraıymy.
Spıkerlerdiń atap ótýinshe, Meıirimdiler klýbynyń bastamasymen keshe Almaty qalasynyń Ardagerler úıinde quttyqtaý aksıasy ótti. Konserttik baǵdarlamalar uıymdastyrylyp, syılyqtar tabystaldy. Búgin balalardy quttyqtaý bastaldy, 30-31-ne qaraı óz úılerinde turyp jatqan jalǵyzbasty zeınetkerlerdi quttyqtaýdy josparlanyp otyr.
«Almatyda qaıyrymdylyq sharalary men quttyqtaý sharalaryn óz deńgeıinde uıymdastyratyn 30-dan astam iri volonterlik uıym bar. Bizdiń aksıalarymyzǵa 50-ge jýyq erikti qatysýda. Kóbine olar uıymdastyrý sátterinde, syılyqtardy tańdaý men satyp alýǵa kómektesedi», - dedi B.Anarbaeva.
Brıfıń sońynda spıkerler bul aksıalardyń jyl saıyn ótkiziletinin jáne ár jyly olardyń nysanaly aýdıtorıasy ózgerip otyratynyn aıtty.
«Bizdiń aksıamyzdy qalamyzdyń kásipkerleri qoldap otyr. Olar bizdiń zeınetkerlerge de, balalarǵa da syılyq alýǵa kómektesedi. Aksıalardy volonterlik uıymdar uıymdastyrady, biraq demeýshiler qarjylandyrady. Almaty qalasynyń ákimdigi óz tarapynan bul sharalardy uıymdastyrýǵa turaqty túrde qoldaý kórsetip keledi», - dep túıindedi sózin B.Anarbaeva.