Almaty qalalyq polısıa departamentine Naýryzbaı aýdandyq polısıa basqarmasynyń qyzmetkerleriniń atyna turǵynnan alǵys hat kelip tústi, dep habarlaıdy aqshamnews.kz Polisia.kz-ke silteme jasap.
Valentına Sergeevna esimdi qala turǵyny kámeletke tolmaǵan ulynyń jalǵyz ózi balyq aýlaýǵa ketip, baılanysqa shyqpaı qoıǵanyn habarlaǵan. Anasy balasyna úsh saǵat boıy habarlasa almaı, aqyr sońynda polısıadan kómek suraýǵa májbúr bolǵan. Shaqyrtý túsken sátte oqıǵa ornyna jedel túrde patrúldik ekıpaj jiberildi. Polısıa qyzmetkeri Almasbek Aýelov áriptesterimen birge balanyń geolokasıasyn anyqtap, izdeýdi dereý bastady. Bar bolǵany bir jarym saǵat ishinde jasóspirim tabylyp, úıine aman-esen oraldy. Qyzmetkerler ata-anasymen jáne jasóspirimmen profılaktıkalyq áńgime júrgizip, eresektersiz sý aıdyndaryna barýdyń qaýipti ekenin túsindirdi.
"Barlyq qyzmetkerlerińiz azamattardyń máselesine beıjaı qaramasa eken deımin. Bul – basqa sala mamandaryna da úlgi. Patrúldik polısıa qyzmetkerlerine sheksiz alǵysymdy bildiremin, — delingen almatylyq turǵynnyń hatynda. Naýryzbaı aýdandyq polısıa basqarmasynyń bastyǵy Dıdar Jakıpbaev mundaı alǵys sózderdiń mańyzy erekshe ekenin atap ótti: — Azamattardyń pikiri biz úshin óte qundy. Árbir alǵys – qyzmetkerler úshin joǵary baǵa ári úlken motıvasıa. Bul olardyń mamandyǵynyń qanshalyqty jaýapty ári mańyzdy ekenin eske salady. Biz turǵyndardyń ózderin qaýipsiz sezinýi jáne polısıaǵa senim artýy úshin barlyq kúshimizdi jumsaımyz", dedi ol.