Qaladaǵy 316 407 adam ekpe aldy, bul shahar halqynyń 16%-yn quraıdy.
Qala dárigerleri Almatyda ekpe sharalary qalaı júrip jatqanyn baıandap berdi, dep habarlaıdy Almaty-akshamy.kz.
Halyqty KVI-ǵa qarsy vaksınasıalaý qyzmet babynda kópshilikpen (medısına qyzmetkerleri, ýchaskelik polısıa, ákimdik qyzmetkerleri, komýnaldyq qyzmet, qoǵamdyq tamaqtaný, saýda qyzmetkerleri) kúndelikti baılanysta bolatyn mamandardan bastaldy. Búginge deıin 316 407 adam vaksınasıalandy, bul qala halqynyń 16%-yn quraıdy jáne oǵan qosa aýyryp jazylǵan adamdar 5%, barlyǵyn qosqanda, qala turǵyndarynyń ujymdyq ımýnıteti 21%-dan asty.
KVI syrqatynyń aýyrlyǵy boıynsha táýekel tobyna jatatyn 60 jastan asqan ekpe alǵandar 32 758 adamdy nemese osy jas sanatyndaǵy adamdardyń jalpy sanynyń 12%-dan astamyn quraıdy. (Qalanyń medısınalyq uıymdarynda, mektepterde, mádenıet, sport nysandarynda, bazarlarda jáne saýda oıyn-saýyq ortalyqtarynda 211 vaksınasıalaý pýnkti jumys isteıdi. Olardyń sanyn ári qaraı 250-ge deıin kóbeıtýge bolady. Osy jumystarǵa quramynda 1 257 mamany bar 304 egý brıgadasy jumyldyryldy).
Aýrýdyń tómendeýine shaǵyn jáne orta bıznes nysandarynda ASHYQ júıesin engizý, monıtorıńtik toptar tarapynan nysandardy júıeli baqylaý, KVI-diń belsendi oshaqtary bar kóp páterli úılerdiń qoǵamdyq oryndarynda (kireberister, baspaldaq aralyqtary, lıftiler, balalar oıyn alańdary) profılaktıkalyq dezınfeksıa jumystaryn júrgizý oń áserin tıgizdi.
ASHYQ jobasy Almaty qalasynda aqpan aıynan bastap júzege asyrylýda. Basty mindetterdiń biri - oń nátıjeli PTR testi bar turǵyndardyń, sondaı-aq olarmen baılanysta bolǵan adamdardyń qoǵamdyq oryndarǵa, onyń ishinde kásipkerlik sýbektilerine barýǵa qoljetimdiligin shekteý jáne sol arqyly 14 kúndik úı karantınin saqtaý bolyp tabylady. Almaty qalasynda engizilgen sátten bastap ASHYQ mobıldik qosymshasynyń kómegimen QR-kodpen óz mártebesin skanerleý nátıjeleri boıynsha ASHYQ jobasy shaǵyn jáne orta bıznes nysandaryna kirýge kelesi turǵyndarǵa jol bermedi: 1235 turǵynda qyzyl mártebe, 298 turǵynda sary mártebe rastaldy. Onyń ishinde offlaın skanerlegen kezde – ASHYQ jobasy ókilderi jumys isteıtin kásipkerlik nysandarǵa kirgen kezde 551 turǵynnyń «qyzyl» mártebesi, 131 adamnyń «sary» mártebesi rastaldy. Qalǵandary ózin-ózi baqylaý úshin onlaın rejıminde jumys isteıdi, osylaısha «kók» mártebesi bar kelýshiler arasynda KVI aýrýyn juqtyrýdy jáne tirkeýdi boldyrmaıdy. Sondaı-aq, ASHYQ jobasy turǵyndarǵa mobıldi qosymshanyń kómegimen úı karantınin buzbaı, óz mártebesin «qashyqtan» tekserýge múmkindik beredi. Internettegi ádispen 649 turǵynǵa qyzyl mártebe, al 144 turǵynǵa sary mártebe rastaldy.
Atalǵan sharalar kesheniniń nátıjesinde KVI boıynsha táýliktik ósim 6 esege, mamyr aıynyń basynda 1,2%-dan búgingi kúni 0,2%-ǵa deıin tómendedi. Sońǵy táýlikte Almaty qalasynda mamyr aıynyń alǵashqy kúnderindegi málimetke qaraǵanda 605-608 bolǵan kórsetkishten 143-ke azaıǵan.