Qazaqstan Respýblıkasynyń Prezıdenti Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty Joldaýynda mádenıettiń damýyna basa nazar aýdardy.
Almatyda mádenı ınfraqurylymdy jaqsartý jónindegi mindetter qalaı júzege asyrylyp jatqandyǵy týraly megapolıstiń mádenıet basqarmasynyń bastyǵy Ǵanı Maılybaev Óńirlik komýnıkasıalar qyzmetiniń brıfıńinde aıtty, dep habarlaıdy Almaty-akshamy.kz.
Spıker Memleket basshysynyń sózinde mádenıet salasynyń aldyna aýqymdy mindetter qoıylǵanyn, ásirese onyń talantty ókilderin, eldiń damýyndaǵy zıaly qaýymnyń róline erekshe mán berilgenin aıtty.
Spıker Almaty qalasynyń ákimi Baqytjan Ábdiruly Saǵyntaevtyń tapsyrmasymen «Almaty - 2050» Strategıasy aıasynda mádenıet salasynda turǵyndardy qalanyń mádenı ómirine tartý, mádenı qundylyqtarǵa qoljetimdilikti arttyrý mindeti belgilengenin atap ótti.
«Alǵa qoıylǵan mindetti sheshý úshin biz kelesi bastamalardy júzege asyrýdamyz. Birinshiden – qalanyń mádenı obektilerin barsha turǵyndar men halyq úshin barynsha qoljetimdi etý. Ekinshiden – dástúrli halyq mádenıetin qoldaý. Úshinshiden – mádenı ónimderdi álemdik naryqqa shyǵarý», - dep habarlady Ǵ. Maılybaev.
Q.-J. Toqaev óziniń Joldaýynda keler jyldan bastap mádenıet qyzmetkerleriniń jalaqysy kóteriletinin, sondaı-aq bilim men densaýlyq saqtaý salasynda qoldanysta bolǵan áleýmettik jeńildikter beriletinin aıtty.
Almaty qalasy IýNESKO-nyń kreatıvti qalalar jelisine múshe bolýynyń arqasynda «Mýzyka» shyǵarmashylyq baǵyty boıynsha búkil álemge tanymal. Jyl saıyn qalada «oren-air» formatynda 100-ge jýyq iri mádenı-buqaralyq is-sharalar ótkiziledi. Tipti pandemıalyq rejımde bul sala damýyn jalǵastyrýda.
Almatynyń mádenı ınfraqurylymynda 160 mádenı obektiler men uıymdar oıdaǵydaı jumys jasaýda.