Segiz jyl salynǵan Óskemen – Taldyqorǵan tas joly resmı túrde iske qosyldy
Halyq arasynda «Almaty trassasy» dep tanymal Óskemen – Taldyqorǵan avtojolyn jasaýǵa shamamen segiz jyl ýaqyt ketti dep habarlaıdy aqshamnews.kz
Uzaq merzimdi qurylystyń basty sebepteri – pandemıa, qarjy men materıaldardyń jetispeýshiligi. Alaıda búgingi tańda jol zamanaýı talaptarǵa saı: tórt jolaqty magıstral jaryqtandyrý júıesimen, jol belgilerimen jáne eki deńgeıli kólik aıyryǵymen jabdyqtalǵan.
«Keıbir ýchaskelerde jumystar 2017 jyly bastalǵan. Basqa ýchaskeler sol ýaqytta jobalanǵan bolatyn. Pandemıa saldarynan qurylys toqtatyldy, al odan keıingi kezeńde joba quny azdap ósti. Osyǵan baılanysty jobany túzetýge týra keldi», – dedi «QazAvtoJol» basshysy Darhan Imanashev.
Jobany qarjylandyrýdy Qytaı banki júzege asyrdy, al qurylys jumystaryn qazaqstandyq-túrik kompanıasy oryndady. Jalpy, joldy qaıta qurýǵa shamamen 300 mıllıard teńge jumsaldy. Segiz jyl ishinde joba quny shamamen 30 paıyzǵa qymbattady.
Óskemen – Qalbataý – Taldyqorǵan trassasy Jetisý, Abaı jáne Shyǵys Qazaqstan oblystaryn baılanystyrady. Uzyndyǵy – 768 shaqyrym. Bul avtomagıstral halyqaralyq tranzıttik tasymaldaý úshin mańyzdy kólik dálizi bolyp sanalady.