Almaty "Tóle bı" meshitiniń ustazy Baýyrjan Kóptileýov vaksınalardyń arqasynda myńdaǵan adamnyń ómirin saqtap, ujymdyq qyzmetterge tezirek oralýǵa bolatynyna senimdi.
B. Kóptileýov vaksınalar qoǵamdy qutqarý úshin jasalǵan dep esepteıdi.
"Qastandyq teorıasyna senbeý kerek, din máselelerinde ımamdardy, medısına máselelerinde dárigerlerdi tyńdaý kerek. Qazir koronavırýstyń tórtinshi tolqynynyń shyrqaý shegi jaqyndap keledi, adamdar jappaı aýyrady, qysqa merzimde halyqty vaksınalaý kerek. Adam ómirin saqtaý jáne qutqarý úshin jasalyp jatqan barlyq isterge sharıǵat tyıym salmaıdy, kerisinshe, quptalady", – dedi "Tóle bı" meshitiniń ustazy. Sondaı-aq paıǵambarymyzdyń s.ǵ.s ”Ózińe de ózgege de zıan tımesin” degen hadısin eske saldy.
Sóz sońynda din qyzmetkeri sharıǵatqa sáıkes, eger bir adam ómirin saqtap qalsa, bul búkil álemdi qutqarýmen teń, sondyqtan bir-birińizdi sanıtarlyq-epıdemıologıalyq normalardy saqtaýǵa, betperde taǵýǵa shaqyrýyńyz kerek.
Tıisti málimdemede Qazaqstan musylmandary dinı basqarmasy adal musylmandardy jaqyndary men baýyrlarynyń densaýlyǵy men ómirin saqtaý úshin vaksınadan ótýge shaqyrdy.
"Ózderińiz biletindeı, bizdiń elimizde jáne álemde indetpen baılanysty jaǵdaı kúrdeli. Kún saıyn bir otbasynan birneshe adam juqpaly aýrýdan qaıtys bolady. Bul vaksınanyń qajettiligin kórsetedi. Sondyqtan densaýlyǵymyz ben ómirimizdi saqtap qalý úshin vaksınadan ótýge shaqyramyz", – delingen QMDB habarlamasynda.