QHR-ǵa jumys sapary aıasynda Almaty ákimi Erbolat Dosaev Tus-Holdings Co. dırektorlar keńesiniń tóraǵasy Van Szúmen kezdesti.
Taraptar ınovasıa, tehnologıalyq damý jáne ınvestısıalyq jobalar boıynsha yntymaqtastyqtyń keleshegin talqylady, dep habarlaıdy aqshamnews.kz.
Tus-Holdings Co. – Sınhýa ýnıversıteti negizinde qurylǵan ǵylymı-tehnologıalyq ınvestısıalyq memlekettik-jekemenshik holdıńtik top. Onyń naryqtyq kapıtalızasıasy 28 mlrd AQSH dollar. Kompanıanyń álemniń 80-den astam qalasynda ınovasıalyq tehnoortalyqtary, 200-den astam tehnologıalyq ınkýbatorlary jáne 400 tehnoparki bar. Sondaı-aq, Tus-Holdings Co. Beıjińde «TusPark» jobasyn júzege asyrýda. Bul álemdegi eń iri ýnıversıtet janyndaǵy ǵylymı-tehnologıalyq park.
Kezdesý barysynda Qazaqstanda bıznes-ınkýbator, bilim berý klasteri jáne ǵylymı park qurý sıaqty jobalardy iske asyrý múmkindigi qarastyryldy.
Erbolat Dosaevtyń aıtýynsha, Almatyda ekonomıkany ártaraptandyrý aıasynda joǵary tehnologıalyq óndirister, kreatıvti ındýstrıa, IT-sektor jáne týrızm qarqyndy damyp keledi. Qaladaǵy Indýstrıaldy aımaq pen «ITP» AEA búginde avtomobıl jasaý, medısınalyq buıymdar óndirisi, ǵylymı-bilim berý jáne AKT (aqparattyq-kommýnıkasıalyq tehnologıalar) salalarynda klasterler qalyptastyratyn negizgi alańdarǵa aınalǵan.
«Ótken jyldyń jeltoqsan aıynda halyqaralyq reıtıń agenttigi Fitch Almaty qalasynyń táýelsiz nesıelik reıtıńin «BBB+» deńgeıinde rastady. Bul Qazaqstan Respýblıkasynyń «BBB» deńgeıindegi egemendik reıtıńinen joǵary. Almatynyń joǵary nesıelik reıtıńi qarqyndy ekonomıkalyq damýymen, jergilikti búdjettiń kiristeriniń aıtarlyqtaı ósýimen jáne tómen qaryz júktemesimen baılanysty. Qazaqstannyń eń iri ekonomıkalyq ortalyǵy retinde qalamyz Qytaı ınvestısıalary úshin negizgi hab bolýǵa daıyn», – dedi Erbolat Dosaev.
Óz kezeginde, Tus-Holdings Co. dırektorlar keńesiniń tóraǵasy Van Szú «Almaty – Qazaqstandaǵy eń ınvestısıalyq tartymdy óńirlerdiń biri» ekenin atady. Ol kompanıanyń «ITP» AEA-pen seriktestikke qyzyǵýshylyq bildiretinin jáne Qazaqstandy ǵylymı jáne tehnologıalyq bastamalardy júzege asyrý úshin bolashaǵy zor naryq retinde qarastyratynyn aıtty.
Tus-Holdings Co. ókilderi bıyl naýryz aıynda Qazaqstanǵa kelip, jergilikti naryqty zertteý maqsatynda kezdesý ótkizýdi josparlap otyr. Sondaı-aq, Almatyda 50/50 úlesimen birlesken tehnopark ashý máselesi qarastyrylady.
Kelissózderdiń qorytyndysynda Erbolat Dosaev Tus-Holdings Co. ókilderine kezdesýge ýaqyt bólgeni úshin alǵys bildirip, tehnologıalyq kásipkerlik ekojúıesin damytý aıasynda ózara tıimdi seriktestikke senim artatynyn aıtty.