Bul týraly óńirlik komýnıkasıalar qyzmeti alańynda «Qazseldenqorǵaý» MM Almaty fılıalynyń ókili Samat Dáýlenkanov aıtty.
Almatyda halyq pen nysandardy qorǵaý maqsatynda 7 ret qar túsirildi. Sondaı-aq, qar kóshkininiń qaýipti kezeńi bastalǵaly beri taýdan 35 márte (39 100 tekshe metr) qar túsken, dep habarlaıdy Almaty-akshamy.kz
Spıkerdiń málimetinshe, profılaktıkalyq maqsatta túsirilgen qardyń jalpy aýdany 2 460 tekshe metrdi qurady.
«Búgin tańǵy saǵat 07.00-degi jaǵdaı boıynsha Kishi Almaty ózeni alabynda qar jamylǵysynyń bıiktigi: Medeý bógeti aýdanynda – 36 sm, Myńjylqy – 50 sm, Qotyrbulaq ózeni alabynda 69-120 sm. Úlken Almaty ózeni alaby boıynsha qar jamylǵysynyń bıiktigi 9-dan 78 sm-ge deıin. Aqsaı jáne Qarǵaly ózeni alabynda qar jamylǵysynyń bıiktigi – 4 sm, Aqsaı-Aqjar baqylaý beketinde – 6 sm», – dedi Samat Dáýlenkanov.
Ol meteorologıalyq, qar kóshkini jaǵdaıy ózgergen jaǵdaıda jáne qar túrinde qatty jaýyn-shashyn kezinde qar kóshkini júrýi múmkin ekenin aıtty.
«Qar kóshkininiń aldyn alý úshin ortalyq apparattyń usynysymen blokpostar qoıylyp jatyr. «Medeý-SHymbulaq» jáne «Almaty-ÚAK» avtojoldaryna, basqa da qaýipti aımaqtardaǵy joldar qar kóshkini qaýpi jaǵdaıynda jabylyp, blokpost qoıylyp jatyr. «Qazseldenqorǵaý» MM Almaty qalalyq paıdalaný-tehnıkalyq basqarmasynda 32 adam, 21 arnaıy tehnıka daıyn tur», – dedi spıker.
Sondaı-aq onyń málimetinshe, qazirgi ýaqytta qyzmet kórsetý aımaǵy boıynsha topyraqtyń qatýy: Úlken Almaty ózeni alabynda – 10 sm, Kishi Almaty ózeni alabynda – 28 sm, Aqsaı ózeni alabynda – 20 sm, Qarǵaly ózeni alabynda – 18 sm.