Aerovızýaldy sholý teńiz deńgeıinen 800-4200 metr bıiktikte ótti
Almaty taýlarynda muzdyqtardyń erý prosesi baıqalmaıdy. Bul týraly qala mańyndaǵy taýlarǵa aerovızýaldy sholý júrgizý barysynda belgili boldy, dep habarlaıdy Almaty-akshamy.kz TJD-niń baspasóz qyzmetine silteme jasap.
Almaty qalasynyń tótenshe jaǵdaılar departamentinen málim etkendeı, Almaty qalalyq TJD, «Qazseldenqorǵaý» MM, «Qazgıdromet» RMK Almaty qalasy boıynsha fılıalynyń mamandary shahar mańyndaǵy taýlardy keshendi baǵalaý maqsatynda aerovızýaldy tekserý júrgizdi.
«Taýlarda muzdyqtardyń ablásıa (erý) prosesi baıqalmaıdy. Barlyq morenalyq kólder qysqy rejımde bolýyna baılanysty qala turǵyndary men ınfraqurylymyna qaýip tóndirmeıdi», - delingen habarlamada.
Aıta keteıik, aerovızýaldy sholý teńiz deńgeıinen 800-4200 metr bıiktikte ótti. İle Alataýy jotasy ózenderiniń baseınderi boıynsha Aqsaıdan Túrgenge deıingi bıik taýly morenalyq kólder men muzdyqtardyń, sel oıyqtary men oshaqtarynyń jaı-kúıi zertteldi.
Almaty qalalyq TJD taýly jerlerde qar kóshkininiń baıqalýyna baılanysty azamattarǵa taý baýraılaryna shyqpaýdy eskertti.