Qazaqstan aldaǵy jyly ótetin stýdenttik kásipkerliktiń Álemdik kýbogyn ótkizý quqyǵyna alǵash ret ıe boldy.
Almatyda «BUSINESS COLLABORATION FORUM 2023» bıznes-forýmy ótip jatyr, dep habarlaıdy Almaty-akshamy.kz
Forýmǵa Respýblıkanyń 51 oqý ornynyń mektep oqýshylary men stýdentteri, kásipkerler jáne ENACTUS baǵdarlamasynyń qonaqtary qatysty. Qazaqstannyń túkpir-túkpirinen jınalǵan jastar ózderiniń bıznes-jobalaryn usynýǵa múmkindik aldy.
Forým barysynda sóz alǵan Almaty qalasy ákiminiń orynbasary Álisher Ábdiqadyrov jastarǵa sáttilik tiledi.
- 1995 jyldan bastap Qazaqstanda ENACTUS jobasy daryndy jastarǵa jańa múmkindikter ashyp, olardyń ózindik ıdeıalaryn engizip, bıznes-jobalardy júzege asyrýda. Almaty - stýdentter qalasy. Shaharda 35 JOO ornalasqan. Onda 200 myńǵa jýyq stýdent bilim alyp keledi. Ótken jyly Almaty qalasynyń ákimdigimen 2025 jylǵa deıingi qalanyń damý baǵdarlamasy bekitildi. Onyń ishinde qala jastaryna bilim berý, jumyspen qamtý, qajetti ınfraqurylymmen qamtamasyz etý máselelerine asa mán berildi. Qysqa merzimdi kýrs oqyp, jumys tabýǵa múmkindik beretin JasAlmaty.kz portaly iske qosyldy. Sáýir aıynda jas kásipkerler klýby quryldy. Qorytyndylaı kele, árqaısysyńyzǵa bızneste tabysqa jetýdi tileımin, – dedi Almaty qalasy ákiminiń orynbasary Álisher Ábdiqadyrov.
ENACTUS Kazakhstan uıymynyń prezıdenti Albına Erjanova elimizdiń «ENACTUS WORLD CUP 2024» stýdenttik kásipkerliktiń Álemdik kýbogyn ótkizý quqyǵyn jeńip alǵanyn atap ótti.
Oqý jylynyń sońynda úzdik bıznes-jobalar ENACTUS Kazakhstan kýbogyna qatysady. Onda jeńiske jetken joba álemdik jarysqa joldama alady. Jaqynda ǵana biz ENACTUS-tyń álemdik kýbogynan keldik. Onda Qazaqstan kelesi jyly ótetin stýdenttik kásipkerliktiń Álemdik kýbogyn ótkizý quqyǵyna alǵash ret ıe boldy. Álemniń úzdik ýnıversıtetteri men úzdik komandalary Astana qalasynda 2024 jyly jınalady, – dedi ENACTUS Kazakhstan uıymynyń prezıdenti Albına Erjanova.
Sondaı-aq, forým aıasynda ENACTUS Kazakhstan EXPO – ınovasıalyq, ekologıalyq, áleýmettik, digital jáne bıznes jobalar kórmesi uıymdastyryldy.
