Qazaq memlekettik sırkiniń ártisteri Batyr Januzaq, Marlen Maratov jáne Zarına Dıgarbekova tanymal brıtandyq Britai 's Got Talent («Brıtanıa talant izdeıdi») teleshoýynda óner kórsetti. Olar kúrdeli akrobatıkalyq nómirdi oryndady, onda qatysýshylardyń biri baspaldaqpen kóterildi, al seriktes onyń basyna súıenip, bir qolymen tirek jasady.
«Osy ýaqyt ishinde bizdiń júregimiz qatty soǵýmen boldy. Akrobattar bir-biriniń ústinde tepe-teńdikti saqtaı otyryp, baspaldaqpen kóterilý kezinde bizdi keremet sheberlikterimen tań qaldyrdy. Muny úıde qaıtalaýǵa tyryspańyz», - dep atap ótti jobany uıymdastyrýshylar.
Jobanyń kórermenderi men qazylar alqasy Saımon Koýell, Amanda Holden, Alısha Dıkson jáne Brýno Tonıolı ártisterge qoshemet kórsetti. Qazaqstannan qatysýshylar 17 mamyrda ótetin jobanyń ekinshi týryna biraýyzdan ótti.
«Bizdiń ártisterimiz alǵash ret Britain's Got Talent sahnasynda sırk nómirimen óner kórsetip, ekinshi týrǵa ótti. Biz óte qýanyshtymyz jáne olarǵa sáttilik tileımiz. Olardyń kelesi nómiri de óte qyzyqty bolady jáne kórermenderdi tań qaldyrady. Jalpy, bizdiń sırk ártisteri óz sheberlikterin únemi jetildirip, Eýropa men AQSH-ta óner kórsetip, elimizdi dáripteıdi. Sondaı-aq, jas ártister qala ákimdiginiń qoldaýymen úzdik beıindi sheteldik joǵary oqý oryndarynda biliktiligin arttyrýdan ótip, halyqaralyq festıváldar men konkýrstarǵa qatysady», - dep atap ótti Almaty qalasy mádenıet basqarmasynyń basshysy Ǵanı Maılybaev.
Britain's Got Talent - bul brıtandyq talanttardyń tanymal realıtı-shoýy. Joba jeńimpazdary aqshalaı syılyq pen 2024 jyldyń qarashasynda Londonda ótetin Royal Variety Performance-te óner kórsetý múmkindigine ıe bolady.