Almatyda BSP, Daýn sındromy jáne aýtızmmen aýyratyn balalar Qazaq memlekettik sırki bazasynda tegin ıppoterapıa kýrsynan ótýge múmkindik aldy. Bul jaıynda qalanyń Mádenıet basqarmasy málimdedi.
Qarapaıym qımyl-qozǵalys jasaý jáne qorshaǵan ortamen baılanys ornatý qıynǵa soǵatyn balalar úshin jylqylarmen qarym-qatynas ońalýdyń jańa jolyn ashty. Kópshilik úshin bul jaı ǵana alǵash ret atqa miný emes, erekshe ári qýanyshty sát boldy.
Ippoterapıa – qımyl-qozǵalys qabiletin, úılestirýdi, zeıin men ózine degen senimdilikti arttyrýǵa baǵyttalǵan ǵylymı turǵydan dáleldengen ońaltý ádisi. Sırktegi mundaı seans balanyń esinde uzaq saqtalatyn áserli ári jyly estelikke aınalady.
Sabaqty arnaıy daıyndyqtan ótken kásibı ıppoterapevt mamandar júrgizdi. QazMemSırktiń Nomad Stunts komandasy jattyǵý úshin balalarǵa arnaıy úıretilgen jýas jylqylar ákeldi.
«Jylqy balanyń árbir qımylyn, ishki kúıin ańǵarady. Ol bala úshin dosqa, serikke aınalady. Biz ár balanyń ózine degen senimdilikti sezinýine múmkindik beretin qaýipsiz orta jasaımyz. Bizdiń sırk qaıyrymdylyq qoıylymdarmen shektelmeı, ıppoterapıany da ótkizedi. Balalarmen jumys isteý biz úshin úlken mártebe ári qýanysh», - dedi sırk artısi, Nomad Stunts komandasynyń jetekshisi Qanatbek Kúnǵojınov.
Ippoterapıaǵa alǵash ret qatysqan jeti jastaǵy Álimniń anasy bul tájirıbeniń uly úshin shynaıy serpilis bolǵanyn aıtty.
«Álim kishkentaı kezinen adamdarmen aralasýda, emosıasyn bildirýde qıyndyq kórip keldi. Alǵashqy seans bolǵanyna qaramastan, ol atqa qýana minip, sheńberdi birneshe ret aınaldy. Onyń júzindegi kúlki men senimdi qımyl mundaı jattyǵýdyń qanshalyqty mańyzdy ekenin dáleldep tur. Bul – balam úshin naǵyz serpilis. Osyndaı ıgi is-sharany uıymdastyryp, qatysý múmkindigin bergenderińizge alǵysym sheksiz», – dedi Merýert Sársenǵalıeva.
Balalar ıppoterapıa sabaqtaryna «ARDI» múmkindigi shekteýli balalardyń ata-analarynyń qaýymdastyǵy men áleýmettik qyzmet kórsetý ortalyqtary arqyly shaqyrylady. Búginge deıin Almaty sırki bazasynda 40-qa jýyq bala tegin ıppoterapıa kýrsynan ótti.