Qala aýmaǵynda qatty jer silkinisteri kútilmeıdi.
QR Tótenshe jaǵdaılar jónindegi mınıstrliktiń Seısmologıa ınstıtýtynyń dırektory Dáýlet Sársenbaev Óńirlik komýnıkasıalar qyzmetiniń brıfıńine qatysty, dep habarlaıdy Almaty-akshamy.kz.
«Bizdiń ınstıtýttyń bazasynda turaqty boljam jasaıtyn komısıa bar. Onyń qorytyndysy boıynsha, osy jyldyń sońyna deıin Almaty qalasynyń aýmaǵynda qatty jáne zilzalaly jer silkinisteri kútilmeıdi», - deıdi ÓKQ spıkeri.
Sonymen qatar, ol Almaty turǵyndaryn jalpyqalalyq josparly seısmıkalyq oqý-jattyǵý kezinde úreıge boıy aldyrmaýǵa, áleýmettik jelilerdegi arandatýshylyq sózderge ermeýge shaqyrady. Jalpyqalalyq seısmıkalyq oqý-jattyǵý jyl saıyn halyqty jer silikinisi kezinde qalaı áreket etýge daıyn bolý kerektigine daıyndaý maqsatynda ótkiziledi.
Jýrnalıserdiń suraqtaryna jaýap bergen Dáýlet Sársenbaev aldaǵy boljamdy túrde jer silkinisiniń naqty kúnin álemniń eshbir jerinde anyqtaı almaıtyndaryn aıtty. Degenmen, bul máselemen almatylyq ǵalymdar aınalysýda. Olar kún saıyn seısmologıalyq stansıalardan málimetter jınap, boljamdy anyqtaý úshin 200-den astam parametrdi óńdeıdi.
«0,7 yqtımaldylyq boıynsha, bizdiń sarapshylar bizde kúshti joıqyn jer silkinisi bolmaıdy dep senimdi túrde málimdeıdi. Almaty qalasy turǵyndaryn eskertý jáne aldyn ala habarlaý aıasynda ákimdiktiń, Tótenshe jaǵdaılar departamentiniń jáne bizdiń Seısmologıa ınstıtýtynyń qoldaýymen kúshti jer silkinisin erte habarlaý júıesin engizý jumystary júrgizilýde. Memleket basshysy atap ótkendeı, 2025 jylǵa deıin erte habarlaý júıesimen jáne "Dármen" mobıldi qosymshasymen biriktire otyryp, 28 erte habarlaý júıesiniń stansıasyn ornatý josparlanýda», - dedi Dáýlet Sársenbaev.