Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan.
"Altynemel" memlekettik ulttyq tabıǵı parki men «İle-Balqash» memlekettik tabıǵı rezervaty arasynda ekologıalyq baılanysty qalpyna keltirý maqsatynda «Qapshaǵaı-Balqash» ekologıalyq dálizi quryldy, dep habarlaıdy Almaty-akshamy.kz QazAqparatqa silteme jasap.
«Qapshaǵaı-Balqash» ekologıalyq dáliziniń jalpy aýdany – 973 765 gektar. Bul ekodáliz memlekettik tabıǵı-qoryq qorynyń obektilerin saqtaý, bıologıalyq ártúrlilik, janýarlardyń kóshi-qonynyń tabıǵı joldaryn qorǵaý, jaılastyrý jáne ósimdikterdi saqtaý úshin osy erekshe qorǵalatyn tabıǵı aýmaqtar arasyndaǵy keńistiktik baılanysty qamtamasyz etedi», - delingen Úkimet basshysynyń jaýabynda.
Onyń dereginshe, qazirgi ýaqytta «Almaty-Taldyqorǵan-Óskemen» respýblıkalyq mańyzy bar jol boıynda «Almaty-Saryózek-Taldyqorǵan» jáne «Almaty-Saryózek-Qorǵas» ýchaskelerinde jabaıy janýarlardyń qaýipsiz kóshi-qonyna tıisti ekodýkterdi uıymdastyrý talap etiledi. Bul joldardyń boıynda malǵa arnalǵan arnaıy ótkelder (17 birlik) bolǵanymen, jabaıy janýarlardyń ótýin tolyq qamtamasyz etpeıdi.
«Osyǵan baılanysty Úkimettiń tapsyrmasy boıynsha Ekologıa jáne tabıǵı resýrstar mınıstrligi múddeli memlekettik organdarmen birlesip jabaıy janýarlardyń kóshi-qon joldaryn aıqyndaý jáne joldyń joǵaryda kórsetilgen ýchaskelerinde ekodýktar salý jónindegi jol kartasyn ázirlep jatyr. Sonymen qatar, qaraquıryqtardyń qaýipsiz kóshi-qony úshin jol betkeılerine ruqsat berý, úzdiksiz bólý jáne qorshaý tosqaýyldaryn alyp tastaý jáne belgili bir ýchaskelerde kólik qozǵalysynyń jyldamdyǵyn saǵatyna 60 shaqyrymǵa deıin tómendetý (jyldamdyqty baqylaý kameralaryn ornatýmen) nusqasyn qarastyrý josparlandy. Jol kartasyn ázirleý jáne odan ári iske asyrý Úkimettiń baqylaýynda bolady», - dedi Álıhan Smaıylov.