Almatyda jalpyulttyq daýys berý prosesin qamtamasyz etý úshin qandaı sharalar qoldanylǵany týraly Óńirlik komýnıkasıalar qyzmetiniń brıfıńinde Almaty qalasy aýmaqtyq referendým komısıasynyń tóraıymy Janna Asanova men orynbasary Aıgúl Qalyqova aıtyp berdi, dep habarlaıdy Almaty-akshamy.kz.
«Qalada barlyǵy 574 ýchaske uıymdastyrylǵan, onyń 67-si arnaıy mekemelerde – aýrýhanalar, sanatorııler, áskerı bólimder. Saılaý komısıalarynyń barlyq músheleri kaskadtyq model boıynsha oqytýdan ótti. Barlyq suraqtar boıynsha saılaý ýchaskelerine habarlasa alasyzdar», – dedi J. Asanova.
Spıkerler sondaı-aq daýys berý tártibi men rásimin túsindirdi. Máselen, elimizdiń basqa óńirlerinde tirkelgen, biraq osy kúni Almaty qalasynda júrgen azamattar esepten shyǵarý kýálikterin paıdalana otyryp, ózderiniń konstıtýsıalyq quqyǵyn paıdalana alady.
«Daýys berý kúni saılaýshylar jeke kýálikpen keledi, al áskerı bólimderde áskerı bılet kórsetiledi. Bul jaǵdaıda siz tipti elektrondyq qujattardy paıdalana alasyz. Qazir adamdardyń kópshiliginde eGov mobile mobıldik qosymshasy bar ekeni belgili. Daýys berý kúni Almatyda bolǵan, biraq bastapqyda basqa óńirlerde tirkelgen jeri boıynsha tizimge engen azamattar da kez kelgen ýchaskede alynǵan esepten shyǵarý kýálikteri boıynsha daýys berýge quqyly. Búginde 646 esepten shyǵarý kýáligi berilgen», – dedi A. Qalyqova.
Múmkindigi shekteýli azamattar úshin (densaýlyq jaǵdaıy boıynsha nemese otbasynyń naýqas múshesiniń kútimine baılanysty) úıde daýys berý uıymdastyrylady. Ol úshin aldyn ala ótinish jazý kerek. Mundaı ótinishter 5 maýsymda 12.00-ge deıin qabyldanady.
Eske salsaq, 5 maýsymda saǵat 7.00-den 20.00-ge deıin Qazaqstan Respýblıkasynyń Konstıtýsıasyna túzetýler boıynsha jalpyulttyq referendým ótedi.